‘ऐतिहासिक अपमान’बाट ४५ मिनेट मात्र टाढा रहेको ब्राजिलको उत्कृष्ट पुनरागमन

एजेन्सी : विश्वकप फुटबल २०२६ अन्तर्गत ह्युस्टनमा भएको खेलमा ब्राजिलले रोमाञ्चक पुनरागमन गर्दै जापानलाई २-१ ले पराजित गर्यो।

पहिलो हाफमा १-० ले पछि परेको ब्राजिलले खेलको दोस्रो हाफमा उत्कृष्ट पुनरागमन गर्दै विश्वकपबाट चाँडै बाहिरिने ठूलो संकटलाई टार्न सक्यो।

खेलको पहिलो हाफमा जापानले गोल गर्दै अग्रता बनाएपछि ब्राजिल ठूलो दबाबमा परेको थियो। यदि ब्राजिल यो खेलमा पराजित भएको भए, यो सन् १९६६ यताकै उसको सबैभन्दा चाँडो बहिर्गमन हुने थियो।

ब्राजिलका समर्थकहरूका लागि नकआउट चरणको सुरुवाती खेलमै एसियाली टोलीसँग पराजित हुनु ठूलो अपमान मानिन्थ्यो।

ब्राजिलले सन् २००२ को विश्वकपयता सुरुमा पछि परेको खेललाई पुनरागमन गरेर जितेको इतिहास थिएन। त्यसैले पहिलो हाफ सकिँदा ब्राजिलका खेलाडीहरू चिन्तित मुद्रामा मैदानबाट बाहिरिएका थिए।

ब्राजिलको इतिहासमै पहिलो विदेशी प्रशिक्षकका रूपमा टोली सम्हालेका ६७ वर्षीय इटालियन प्रशिक्षक कार्लो एन्सेलोटी यस्तो गम्भीर परिस्थितिमा पनि शान्त देखिए। दोस्रो हाफमा उनले खेलको रणनीतिमा महत्त्वपूर्ण परिवर्तन गरे।

पहिलो हाफमा ब्राजिलले छोटो छोटो पास खेल्दै जापानको दह्रो डिफेन्स लाइनलाई तोड्ने असफल प्रयास गरेको थियो।

तर दोस्रो हाफमा उनीहरूले आक्रामक खेल खेल्दै बक्सभित्र धेरै क्रसहरू गर्ने रणनीति अपनाए। पहिलो हाफमा जम्मा १२ पटक क्रस बल पठाएको ब्राजिलले दोस्रो हाफमा २८ पटक क्रस प्रहार गर्दै जापानका डिफेन्डरहरूलाई दबाबमा राख्यो।

ब्राजिलको नयाँ रणनीतिको फाइदा उठाउँदै मिडफिल्डर क्यासेमिरोले कर्नर बलमा उत्कृष्ट हेडरमार्फत गोल गर्दै खेललाई १-१ को बराबरीमा ल्याए।

खेल बराबरीमै सकिने र थप समयतर्फ धकेलिने अवस्थामा पुगेका बेला, इन्जुरी समयको ९५औं मिनेटमा गाब्रिएल मार्टिनेलीले गोल गर्दै ब्राजिललाई २-१ को रोमाञ्चक जित दिलाए।

जितसँगै ब्राजिलले आफ्नो छैटौं पटक विश्वकप उपाधि जित्ने सपना जीवितै राखेको छ। खेलपछि पूर्व ब्राजिलियन खेलाडी लुकास लेइभाले यस जितलाई ‘देश बचाउने जित’को संज्ञा दिए।

विश्लेषकहरूले पनि प्रशिक्षक एन्सेलोटीको शान्त र परिपक्व निर्णयका कारण ब्राजिल सम्भावित दुर्घटनाबाट जोगिएको बताएका छन्।

अब अन्तिम १६ को खेलमा ब्राजिलले आइभोरी कोस्ट वा नर्वेमध्ये एक टोलीको सामना गर्नेछ।