नेदरल्यान्ड्स र मोरक्कोबीचको पहिलो हाफ गोलरहित बराबरी, डच डिफेन्डरको टाउकोमा चोट

काठमाडौं : विश्वकप फुटबलअन्तर्गत मोन्टेरी स्टेडियममा भइरहेको नेदरल्यान्ड्स र मोरक्कोबीचको महत्त्वपूर्ण खेलको पहिलो हाफ गोलरहित बराबरी भएको छ। दुवै टोलीले रक्षात्मक र रणनीतिक खेल प्रदर्शन गर्दा पहिलो हाफमा कुनै गोल हुन सकेन।

खेलको सुरुवाती समयमा नेदरल्यान्ड्स (ओरेन्ज) ले बलमाथि नियन्त्रण राख्दै मोरक्कोको रक्षापंक्तिमा खाली ठाउँ खोज्ने प्रयास गरेको थियो। तर, मोरक्कोका डिफेन्डर चादी रियादले डच स्ट्राइकर ब्रायन ब्रुबीलाई कडा मार्किङ गर्दै डच टोलीलाई खुला अवसर सिर्जना गर्न दिएनन्।

नेदरल्यान्ड्सका प्रशिक्षक रोनाल्ड कोम्यानले मोरक्कोको आक्रामक विङ्गरहरूलाई रोक्न यस खेलमा ३ डिफेन्डरको रक्षापंक्ति (ब्याक थ्री) उतारेका थिए, जसलाई फुटबल विश्लेषकहरूले टोलीको परम्परागत शैलीविपरीत भन्दै टिप्पणी गरेका छन्।

सुरुवाती दबाब झेलेपछि मोरक्कोले खेलमा आफ्नो पकड बलियो बनाएको थियो। हाइड्रेसन ब्रेकअघि मोरक्कोले १०० सेकेन्डको अन्तरालमा दुईवटा उत्कृष्ट अवसर सिर्जना गर्यो। एल आयनाउईको प्रहार र कप्तान अशराफ हाकिमीको कडा प्रहारलाई डच गोलकिपर बार्ट भर्ब्रूगेनले उत्कृष्ट बचाउ गर्दै मोरक्कोलाई अग्रता लिनबाट रोके।

खेल शारीरिक रूपमा निकै आक्रामक देखिएको थियो। पहिलो हाफकै क्रममा डच डिफेन्डर यान पल भ्यान हेकेको टाउकोमा चोट लागेर रगत बगेपछि उनलाई पट्टी (ब्यान्डेज) बाँधेर खेलाइएको थियो।

पहिलो हाफको अन्तिम समयमा दुवै टोलीले गोल गर्ने सुवर्ण अवसर पाएका थिए। नेदरल्यान्ड्सका मिकी भ्यान डे भेनले बक्स बाहिरबाट प्रहार गरेको कडा बललाई मोरक्कोका गोलकिपर यासिन बोनोले उत्कृष्ट बचाउ गर्दै पोस्ट बाहिर पठाए।

त्यसको लगत्तै, थप गरिएको समयको अन्तिम मिनेटमा मोरक्कोका इस्माइल साइबारीले गोलपोस्ट नजिकै खाली स्थानमा अचरफ हाकिमीको क्रसलाई सही दिशा दिन नसक्दा खेलको पहिलो हाफ ०-० को बराबरीमा टुङ्गियो।

अहिले दोस्रो हाफको खेल जारी छ।