मेस्सीको ऐतिहासिक ह्याट्रिकदेखि अफ्रिकाको छलाङसम्म : विश्वकप २०२६ को समूह चरणमा कसले के इतिहास रचे?

काठमाडौं : ४८ टोलीको सहभागितामा क्यानडा, मेक्सिको र अमेरिकामा संयुक्त रूपमा भइरहेको फिफा विश्वकप २०२६ को समूह चरण समाप्त भएको छ।

७२ खेलको रोमाञ्चक यात्रा सकिँदा यसपटक मैदानभित्र फुटबल महाशक्तिहरूले मात्र होइन, नयाँ टोलीहरूले समेत कीर्तिमान कायम गरेका छन्। 

समूह चरणमा ४८ राष्ट्रका १ हजार २४८ खेलाडी सहभागी भएका थिए। अब ३२ टोली नकआउट चरणमा प्रवेश गरेका छन्। तीमध्ये १२ टोली युरोप, ९ अफ्रिका, ५ दक्षिण अमेरिका, ३ उत्तर तथा मध्य अमेरिका, २ एसिया र १ ओसिनियाबाट रहेका छन्।

लियोनेल मेस्सीको 'महा-कीर्तिमान': उमेरलाई चुनौती र लगातार छैटौँ जादु

विश्व फुटबलका जादुगर अर्जेन्टिनाका कप्तान लियोनेल मेस्सीले यस विश्वकपमा दुईवटा यस्ता कीर्तिमान बनाए, जुन तोड्न दशकौँसम्म असम्भव प्रायः देखिन्छ। उनी लगातार छ वटा विश्वकप संस्करणमा गोल गर्ने विश्वकै पहिलो खेलाडी बनेका छन्। यससँगै विश्वकपमा उनको कुल गोल संख्या १९ पुगेको छ। ३८ वर्ष ३५७ दिनको उमेरमा सनसनीपूर्ण ह्याट्रिक गर्दै मेस्सीले विश्वकप इतिहासमा सबैभन्दा बढी उमेरमा ह्याट्रिक गर्ने खेलाडीको नयाँ कीर्तिमान पनि आफ्नो नाममा गरेका छन्।

रोनाल्डो र केनको ‘रेकर्ड ब्रेक’ भिडन्त

मेस्सी मात्र होइन, समकालीन फुटबलका अन्य दुई स्टारले पनि आफ्नो देशका लागि नयाँ इतिहास रचेका छन्। पोर्चुगलका कप्तान क्रिस्टियानो रोनाल्डोले विश्वकपमा आफ्नो गोल संख्या १० पुर्याउँदै पोर्चुगलका महान् खेलाडी युसेबियोको कीर्तिमान तोड्दै पोर्चुगलका लागि विश्वकपमा सर्वाधिक गोल गर्ने खेलाडी बनेका छन्।

यस्तै, इंग्ल्यान्डका कप्तान ह्यारी केनले ११ गोलसहित ग्यारी लिनेकरको कीर्तिमान तोड्दै इंग्ल्यान्डका सर्वाधिक विश्वकप गोलकर्ता बने ।

अफ्रिकी महादेशको ऐतिहासिक छलाङ

यस विश्वकपमा ऐतिहासिक सफलता अफ्रिकी राष्ट्रहरूले  हासिल गरेका छन्। विश्वकपको इतिहासमै पहिलोपटक ९ वटा अफ्रिकी टोली नकआउट चरणमा प्रवेश गरेर नयाँ इतिहास रचेका छन्।

यसैबीच, सेनेगल विश्वकपको एकै खेलमा ५ गोल गर्ने पहिलो अफ्रिकी टोली बनेर इतिहास बनाउन सफल भयो।

उत्तर अमेरिकाको नयाँ दबदबा

आयोजक राष्ट्रहरूले घरेलु मैदानको भरपूर फाइदा उठाउँदै कीर्तिमान बनाए। कतारलाई ५–० को विशाल अन्तरले हराउँदै क्यानडा विश्वकपको एउटै खेलमा ४ भन्दा बढी गोल गर्ने पहिलो कन्काकाफ टोली बन्यो। अमेरिकाले पनि पाराग्वेमाथि ४–१ को जित निकाल्दै विश्वकपमा पहिलोपटक एकै खेलमा चार गोल गर्ने कीर्तिमान रच्यो।

रंगशाला बाहिर र भित्रका अन्य दुर्लभ कीर्तिमान

जापानले ट्युनिसियालाई ४–० ले हराएको खेल फिफा विश्वकप इतिहासकै १ हजारौँ खेल बन्न पुग्यो।

समूह चरणका ७२ खेलमा कुल २१५ गोल भए, जुन विश्वकप इतिहासकै सबैभन्दा धेरै हो। प्रति खेल औसत तीन गोल भएको फिफाले जनाएको छ। फ्रान्स, जर्मनी र नेदरल्यान्ड्सले समान १०–१० गोल गर्दै सर्वाधिक गोल गर्ने टोली बने।

बोस्निया एन्ड हर्जगोभिना, केप भर्डे, क्यानडा, डीआर कंगो, कोट डिभ्वार, इजिप्ट र दक्षिण अफ्रिकाले पहिलोपटक विश्वकपको नकआउट चरणमा पुगेर सुखद इतिहास रचेका छन्।
 
मैदानभित्र मात्र होइन, मैदान बाहिर पनि यसपटक नयाँ कीर्तिमान बन्यो। ७२ खेल हेर्न ४५ लाख ४४ हजार ५४९ दर्शक रंगशाला पुगेका थिए भने खेल अवधिभर दर्शकहरूले करिब ३ लाख हटडग खाएर अर्को रमाइलो रेकर्ड बनाएका छन्।

यस महा-कीर्तिमानहरूको जगमा अब ३२ टोलीबीच नकआउट चरणको उपाधि भिडन्त सुरु हुँदैछ, जसले यो विश्वकपलाई इतिहासकै सबैभन्दा स्मरणीय संस्करण बनाउने निश्चित छ।