१९ वर्ष नपुग्दै विश्वकपमा कीर्तिमान बनाएका पाँच खेलाडी

काठमाडौं : फिफा विश्वकपको इतिहासमा १९ वर्षको उमेर नपुग्दै गोल गर्ने खेलाडीको संख्या निकै कम छ, जसमा ब्राजिलका दिवंगत फुटबलर पेलेको कीर्तिमान साढे ६ दशकदेखि अझैसम्म कायमै छ। 

सन् १९५८ को विश्वकपमा १७ वर्ष २३९ दिनको उमेरमा गोल गरेर पेलेले कायम गरेको उक्त कीर्तिमान हालसम्म कुनै पनि खेलाडीले तोड्न सकेका छैनन्। 

पेलेसँगै मेक्सिकोका म्यानुएल रोसास, स्पेनका गाभी, इङ्ग्ल्यान्डका माइकल ओवेन र रोमानियाका निकोलाए कोभाच्स विश्वकप इतिहासकै पाँच कान्छा गोलकर्ताको सूचीमा रहेका छन्।

सन् १९५८ को विश्वकपमा वेल्सविरुद्ध गोल गरेर पेलेले विश्वकपमा सबैभन्दा कम उमेरमा गोल गर्ने इतिहास रचेका थिए। उक्त प्रतियोगितामा ६ गोल गरेका उनले फ्रान्सविरुद्ध सेमिफाइनलमा ह्याट्रिक र स्विडेनविरुद्धको फाइनलमा दुई गोल गरेर ब्राजिललाई विश्व विजेता बनाउन ठूलो भूमिका खेलेका थिए।

सूचीको दोस्रो स्थानमा मेक्सिकोका म्यानुएल रोसास रहेका छन्। उनले सन १९३० को पहिलो विश्वकपमा अर्जेन्टिनाविरुद्ध १८ वर्ष ९३ दिनको उमेरमा गोल गरेका थिए। रोसासले उक्त प्रतियोगितामा अन्य ऐतिहासिक उपलब्धि पनि हासिल गरेका थिए।

तेस्रो स्थानमा स्पेनका युवा मिडफिल्डर गाभी छन्। उनले सन २०२२ को विश्वकपमा कोस्टारिकाविरुद्ध १८ वर्ष ११० दिनको उमेरमा गोल गर्दै विश्वकप इतिहासकै सबैभन्दा कम उमेरका युरोपेली गोलकर्ता बनेका थिए। स्पेनको ७-० को फराकिलो जितमा उनले आकर्षक भलीमार्फत गोल गरेका थिए।

चौथो स्थानमा इङ्ग्ल्यान्डका माइकल ओवेन छन्। उनले सन १९९८ को विश्वकपमा रोमानियाविरुद्ध १८ वर्ष १९० दिनको उमेरमा गोल गर्दै त्यतिबेला सबैभन्दा कम उमेरका युरोपेली गोलकर्ताको कीर्तिमान बनाएका थिए।

सूचीको पाँचौं स्थानमा रोमानियाका निकोलाए कोभाच्स रहेका छन्, उनले सन १९३० को विश्वकपमा पेरुविरुद्ध १८ वर्ष १९७ दिनको उमेरमा गोल गरेका थिए। त्यो उनको विश्वकप करियरको एक मात्र गोल भए पनि इतिहासमा विशेष स्थान बनाउन सफल भएको छ।

विश्वकपको लामो इतिहासमा किशोर उमेरमै गोल गर्ने यी खेलाडीहरूको उपलब्धि आज पनि फुटबल जगतमा प्रेरणादायी मानिन्छ।