अमेरिकी फुटबल स्टारका छोरा एलेक्स फ्रिम्यान फुटबल विश्वकपमा चम्किँदै

एजेन्सी : सन् १९९६ सेप्टेम्बरमा अमेरिकी फुटबलका चर्चित खेलाडी एन्टोनियो फ्रिम्यानले सिएटलमा उत्कृष्ट प्रदर्शन गर्दै आफ्नो टोली ग्रीन बे प्याकर्सलाई जिताएका थिए। त्यसको केही महिनापछि उनी सुपर बोल विजेता बने, जुन अमेरिकी फुटबलको सबैभन्दा ठूलो उपाधि मानिन्छ।

अहिले त्यसको झन्डै ३० वर्षपछि, फ्रिम्यान परिवारकै अर्को नाम सिएटलमा फेरि चर्चामा छ। तर यसपटक खेल अमेरिकी फुटबल नभएर विश्वकप हो।

एन्टोनियोका २१ वर्षीय छोरा एलेक्स फ्रिम्यानले शुक्रबार भएको विश्वकप खेलमा अस्ट्रेलियाविरुद्ध आफ्नो पहिलो गोल गर्दै अमेरिकालाई २-० को जित दिलाए। यस जितसँगै अमेरिकी टोली प्रतियोगिताको नकआउट चरणमा प्रवेश गरेको छ।

‘यो हाम्रो परिवारका लागि एउटा सुखद र ऐतिहासिक क्षण हो,’ खेलपछि एलेक्सले भने, ‘यसले मेरो बुबा आफ्नो ठाउँमा उत्कृष्ट हुनुहुन्थ्यो र म मेरो आफ्नै तरिकाले सफल हुन सक्छु भन्ने देखाउँछ। बुबा जस्तो सफल मार्गदर्शक पाउनु मेरा लागि गर्वको कुरा हो।’

अमेरिकामा परम्परागत फुटबल भन्दा अमेरिकी फुटबल (एनएफएल) बढी लोकप्रिय छ। त्यसैले एलेक्सका लागि फुटबल रोज्नु सजिलो थिएन। प्रसिद्ध खेलाडी बुबाले के भन्नुहोला भन्ने डरले उनले सुरुमा फुटबलप्रतिको आफ्नो रुचि लुकाएर राखेका थिए।

तर उनकी आमा र सौतेनी बुबा (जो उनका पहिलो प्रशिक्षक पनि हुन्) ले उनलाई फुटबल खेल्न हौसला दिए। अहिले उनका बुबा एन्टोनियो पनि छोराको खेल हेर्न मैदानमै पुग्छन् र छोराको सफलतामा निकै खुसी देखिन्छन्।

प्रशिक्षक पोचेटिनोको साथ र खेलमा सुधार
चार वर्षअघिसम्म एलेक्स ओर्लान्डो सिटीको रिजर्भ टोलीमा खेल्थे र राष्ट्रिय टोलीमा उनको चर्चा समेत थिएन। तर सन् २०२४ मा माउरिसियो पोचेटिनो अमेरिकाको मुख्य प्रशिक्षक बनेपछि एलेक्सको खेल जीवनले नयाँ मोड लियो।

युवा खेलाडीहरूलाई विश्वास गर्ने पोचेटिनोले एलेक्सलाई राष्ट्रिय टोलीमा महत्त्वपूर्ण स्थान दिए।

प्रशिक्षक पोचेटिनो भन्छन्, ‘एलेक्स सिक्न चाहने र सधैं प्रशिक्षकको कुरा सुन्ने खेलाडी हुन्। उनीसँग भविष्यमा विश्वकै उत्कृष्ट डिफेन्डर बन्ने क्षमता छ।’

मैदानभित्र मात्र नभई मैदानबाहिर पनि एलेक्स निकै लोकप्रिय बनिरहेका छन्। उनकी सौतेनी दिदी डायमन्ड स्पल्डिङले टिकटकमा ‘मेरो भाइ अमेरिकाको लागि खेल्दै छ, उसलाई समर्थन गर्नुहोला’ भनी राखेको भिडियो निकै भाइरल भयो।

त्यसपछि सामाजिक सञ्जालमा मानिसहरूले उनलाई मायाले ‘डायमन्डको सानो भाइ’ र ‘अमेरिकाको सानो भाइ’ भन्न थालेका छन्। अमेरिकामा फुटबललाई अझ बढी लोकप्रिय बनाउन एलेक्सको यो यात्राले ठूलो सहयोग पुर्याइरहेको छ।