विश्वकप २०२६ : मेस्सी, एम्बाप्पे र हालान्ड चम्किँदा रोनाल्डोको फितलो सुरुवात

एजेन्सी : बुधबार सन् २०२६ को विश्वकप फुटबलमा विश्वका तीन ठूला स्टारहरूले उत्कृष्ट प्रदर्शन गरे। फ्रान्सका किलियन एम्बाप्पेले सेनेगलविरुद्ध दुई गोल गर्दै देशकै इतिहासमा सर्वाधिक गोल गर्ने कीर्तिमान बनाए।

नर्वेका एर्लिङ हालान्डले आफ्नो पहिलो विश्वकप खेलमै इराकविरुद्ध दुई गोल गरे। यस्तै, अर्जेन्टिनाका लियोनेल मेस्सीले अल्जेरियाविरुद्ध उत्कृष्ट ह्याट्रिक गर्दै विश्वकप इतिहासमा जर्मनीका मिरोस्लाभ क्लोजको सर्वाधिक गोल गर्ने कीर्तिमानसँग बराबरी गरे।

तर, पोर्चुगलका कप्तान क्रिस्टियानो रोनाल्डोका लागि भने खेल सोचे जस्तो रहेन। ६ वटा फरक विश्वकपमा गोल गर्ने पहिलो खेलाडी बनेर इतिहास रच्ने अवसर पाएका रोनाल्डो यस खेलमा असफल रहे। उनको टोली पोर्चुगल डिआर कंगोसँग १-१ को बराबरीमा रोकियो।

४१ वर्षीय रोनाल्डोलाई पूरा समय मैदानमा राखेको भन्दै प्रशिक्षक रोबर्टो मार्टिनेजको आलोचना भएको छ। बीबीसीका टिप्पणीकार तथा पूर्व खेलाडी क्रिस सटनले प्रशिक्षक मार्टिनेज रोनाल्डोलाई मैदानबाट निकाल्न डराएको बताए।

खेलको विवरण
खेलको छैटौं मिनेटमा जोआओ नेभेसको उत्कृष्ट हेडर गोलबाट पोर्चुगलले सुरुवाती अग्रता लिएको थियो। तर, पहिलो हाफ सकिनुअघि डिआर कंगोका योआने विसाले बराबरी गोल फर्काए।

पोर्चुगलले ७५ प्रतिशत समय बल आफ्नो नियन्त्रणमा राखे पनि खेलभरि मात्र ७ पटक गोलको प्रयास गर्यो, जसमा नेभेसको गोलबाहेक अन्य कुनै पनि प्रहार पोस्टको दिशामा थिएन।

खेलको दोस्रो हाफमा रोनाल्डोले गोल गर्ने दुईवटा अवसर पाएका थिए, तर उनले तिनलाई सदुपयोग गर्न सकेनन्।

ठूला प्रतियोगिताहरूमा रोनाल्डोले गोल गर्न नसकेको यो लगातार १०औं खेल हो। खेलभरि उनले जम्मा २५ पटक मात्र बल छुन पाए, जुन पूरा ९० मिनेट खेल्ने पोर्चुगिज खेलाडीहरूमध्ये सबैभन्दा कम हो।

विज्ञहरूको टिप्पणी
खेलपछि पूर्व फुटबलर वेन रुनीले रोनाल्डोलाई गोल गर्नका लागि राम्रा अवसरहरू आवश्यक पर्ने बताए।

अर्का पूर्व खेलाडी थियरी हेनरीले रोनाल्डोको आलोचना गर्दै भने, ‘उनी आफै गोल गर्न हतारिँदा अन्य खेलाडीहरूले सजिलै गोल गर्ने अवसर गुमाए। टोलीले गोल गर्नु महत्त्वपूर्ण हो, कुनै एक खेलाडीले मात्र होइन।’

फ्रान्सका पूर्व डिफेन्डर गेल क्लिचीका अनुसार मैदानमा रोनाल्डो जस्ता ठूला खेलाडीको उपस्थितिले कहिलेकाहीं युवा खेलाडीहरूमाथि मानसिक दबाब सिर्जना गर्छ, जसका कारण उनीहरूले आफ्नो स्वाभाविक खेल खेल्न सक्दैनन्।