विश्वकप इतिहासमै पहिलो पटक : भीएआरको नयाँ नियमले जोगिए अमेरिकी डिफेन्डर, ‘एक्टिङ’ गर्ने खेलाडीलाई सजाय!

एजेन्सी : आयोजकमध्येको एक अमेरिकाले फिफा विश्वकपमा विजयी सुरुवात गर्यो। समूह ‘डी’ अन्तर्गत भएको खेलमा अमेरिकाले पाराग्वेलाई ४-१ ले हरायो।

तर, सोफी स्टेडियममा उपस्थित दर्शक र विश्वभरका फुटबलप्रेमीहरू खेलको नतिजासँगै भिडियो असिस्टेन्ट रेफ्री (भीएआर) को एउटा ऐतिहासिक निर्णयले अचम्ममा परे।

अमेरिका ३-० ले अगाडि रहेको बेला मैदानमा एउटा अनौठो दृश्य देखियो। ३८ वर्षीय अमेरिकी डिफेन्डर टिम रिमले पाराग्वेका मिगुएल आल्मिरोनलाई लडाएको भन्दै डच रेफ्री ड्यानी माकेलीले उनलाई पहेँलो कार्ड दिए।

पाराग्वेले फ्री-किक पनि प्रहार गरिसकेको थियो। तर, लगत्तै भीएआरले रेफ्रीलाई मैदानको स्क्रिन हेर्न भन्यो। सामान्यतया फ्री-किक प्रहार गरेर खेल पुनः सुरू भइसकेपछि निर्णय फिर्ता लिन मिल्दैन, तर रेफ्रीले स्क्रिन हेरेर आफ्नो निर्णय उल्ट्याए।

रेफ्रीले अमेरिकी डिफेन्डर टिम रिमलाई दिइएको पहेँलो कार्ड खारेज गरे। त्यसको बदलामा उनले डाइभ हानेर (झुटो अभिनय गरेर लडेका) पाराग्वेका आल्मिरोनलाई नै पहेँलो कार्ड दिए।

विश्वकपको इतिहासमा ‘गलत पहिचान’को नियम प्रयोग गरेर भीएआरमार्फत निर्णय सच्याइएको यो पहिलो पटक हो।

के हो फिफाको यो नयाँ नियम?
फिफाले यस विश्वकपका लागि केही नयाँ नियमहरू लागू गरेको छ। रेफ्री प्रमुख पियरलुइजी कोलिनाको विशेष आग्रहमा यो ‘गलत पहिचान’ सम्बन्धी नियम नियमपुस्तिकामा थपिएको हो।

नयाँ नियमअनुसार, यदि रेफ्रीले गल्तीवश कुनै खेलाडीलाई कार्ड देखाए, तर वास्तवमा त्यो गल्ती विपक्षी टोलीको खेलाडीले गरेको थियो भने त्यस्तो निर्णय सच्याउन भीएआरको सहयोग लिन सकिन्छ।

सामान्यतया पहिलो पहेँलो कार्डलाई भीएआरले हेर्न मिल्दैन, तर ‘गलत पहिचान’को विशेष प्रावधानका कारण मात्र यो निर्णय सच्याउन सम्भव भएको हो।

यस घटनालाई लिएर पूर्व खेलाडी एश्ले विलियम्सले भने, ‘फ्री-किक प्रहार गर्न दिएर फेरि निर्णय सच्याउनु अनौठो भए पनि यो सही निर्णय थियो।’

यस्तै, पूर्व फुटबलर ड्यानी मर्फीले खेलमा डाइभ हान्ने खेलाडीलाई सजाय दिने जुनसुकै नियम राम्रो हुने विचार राखे।

खेलका अन्य रोमाञ्चक क्षणहरू
नयाँ मुख्य प्रशिक्षक माउरिसियो पोचेटिनोको नेतृत्वमा रहेको अमेरिकाले घरेलु दर्शकमाझ उत्कृष्ट प्रदर्शन गर्यो।

पहिलो हाफमै पाराग्वेका डामियन बोबाडिलाको आत्मघाती गोल र फोलारिन बालोगनको दुई गोलको मद्दतले अमेरिका ३-० ले अघि थियो। बालोगन विश्वकपको एउटै खेलमा दुई गोल गर्ने दोस्रो अमेरिकी खेलाडी बनेका छन्।

दोस्रो हाफमा पाराग्वेका माउरिसियोले एक गोल फर्काए पनि खेलको अन्तिम क्षणमा वैकल्पिक खेलाडी जियोभानी रेनाले उत्कृष्ट गोल गर्दै अमेरिकालाई ४-१ को जित दिलाए।