तीन पटक विश्वकप खेलेको क्यानडा ऐतिहासिक अंक जोड्न सफल

एजेन्सी : क्यानडाले विश्वकप फुटबलको इतिहासमा पहिलो पटक ऐतिहासिक अंक जोड्न सफल भएको छ।

सन् २०२६ को विश्वकप अन्तर्गत समूह चरणको आफ्नो पहिलो खेलमा सह-आयोजक क्यानडाले बोस्निया-हर्जगोभिनासँग १-१ को बराबरी खेल्दै हार टारेको हो।

यसअघि सन् १९८६ र २०२२ को विश्वकपका आफ्ना सबै खेलहरू गुमाएको क्यानडाका लागि विश्वकपको मञ्चमा हारबाट जोगिएको यो पहिलो अवसर हो।

टोरोन्टोमा भएको यस रोमाञ्चक खेलको २१औं मिनेटमा बोस्निया-हर्जगोभिनाले सुरुवाती अग्रता लिएको थियो।

पूर्व आर्सनल डिफेन्डर सेआद कोलासिनाचको पासमा जोभो लुकिचले हेडरमार्फत गोल गर्दै बोस्नियालाई १-० को अग्रता दिलाए।

दोस्रो हाफमा क्यानडाले खेलमा फर्कन निकै प्रयास गर्यो। खेलको ७८औं मिनेटमा मैदान प्रवेश गरेका विकल्प (सबस्टिच्युट) खेलाडी काइल लारिनले उत्कृष्ट गोल गर्दै क्यानडालाई १-१ को बराबरीमा ल्याए।

मैदान छिरेको दुई मिनेटमै उनले डिफेन्डरलाई छक्याउँदै प्रहार गरेको बल गोलकिपर निकोला भासिललाई नाघ्दै गोलपोस्टमा छिरेको थियो।