स्कटल्यान्डलाई ६ विकेटले हराउँदै पाँचौं स्थानमा उक्लियो नेपाल

काठमाडौं : स्पिनरद्वय सन्दीप लामिछाने र ललित राजवंशीको कसिलो बलिङ तथा कप्तान रोहितकुमार पौडेल र इशान पाण्डेको साझेदारीको मद्दतले नेपालले आइसिसी विश्वकप लिग-२ अन्तर्गत त्रिकोणात्मक शृङ्खलामा स्कटल्यान्डमाथि ६ विकेटको जित निकालेको छ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा सोमबार भएको खेलमा स्कटल्यान्डले दिएको १९५ रनको लक्ष्य नेपालले ३८.१ ओभरमा ४ विकेट गुमाएर पूरा गर्यो। यस जितसँगै नेपाल २७ खेलबाट २२ अङ्क जोड्दै तालिकाको पाँचौं स्थानमा उक्लिएको छ।

ललित र सन्दीप हाबी भएपछि टस जितेर पहिला ब्याटिङ गरेको स्कटल्यान्ड १९४ रनमा अलआउट हुन पुग्यो। सन्दीपले यस खेलमा कुल ३ विकेट लिए। त्यस्तै, अर्का स्पिनर ललित राजवंशीले ८ ओभरमा ३२ रन खर्चेर ४ विकेट लिए। सोमपाल कामी, दीपेन्द्र सिंह ऐरी र नन्दन यादवले १-१ विकेट लिए।

१९५ रनको लक्ष्य पछ्याएको नेपालको सुरुआती ब्याटिङ सुखद रह्यो। ओपनरद्वय आसिफ शेख र कुशल भुर्तेलले पहिलो विकेटका लागि ५८ रनको साझेदारी गरे। आसिफ १७ बलमा २९ रन बनाउँदै रनआउट भए भने कुशल २८ रनमा एलबीडब्लू धरापमा परे।

त्यसपछि कप्तान रोहित पौडेल र इशान पाण्डेले तेस्रो विकेटका लागि १०४ रनको निर्णायक शतकीय साझेदारी गर्दै नेपालको जित सुनिश्चित गरे। आफ्नो दोस्रो ओडिआई खेल खेलिरहेका इशानले ६१ बलमा ५ चौका र २ छक्का प्रहार गर्दै ५५ रनको अर्धशतकीय इनिङ्स खेले। 

कप्तान रोहित ७४ रनमा अविजित रहे। उनले ९८ बलको सामना गर्दै ५ चौका र २ छक्का प्रहार गरे। आरिफ शेख ८ रनमा अविजित रहे।

यसअघि टस जितेर पहिले ब्याटिङ रोजेको स्कटल्यान्ड ३९.१ ओभरमा १९४ रनमा समेटिएको थियो। स्कटल्यान्डका लागि ब्रान्डन म्याकमुलेनले ४४ बलमा ६ चौका र ६ छक्काको मद्दतले सर्वाधिक ७३ रनको योगदान दिए। 

त्यस्तै, माइकल इङ्लिसले ५१ रन जोडे भने ओपनर जर्ज मुन्सेले २१ र मार्क वाटले २० रन बनाए। अन्य ब्याटरले भने नेपाली बलरसामु दोहोरो अङ्क जोड्न सकेनन्। जारी शृङ्खलामा नेपालको यो दोस्रो जित हो। नेपालले अब शृङ्खलाको अन्तिम खेल शुक्रबार अमेरिकासँग खेल्नेछ।