प्रतिष्ठानमा पदाधिकारी नियुक्ति पारदर्शी बनाइने स्वास्थ्यमन्त्रीको प्रतिबद्धता

काठमाडौं : स्वास्थ्य तथा खाद्य स्वच्छता मन्त्री निशा मेहताले स्वास्थ्य विज्ञान तथा प्रतिष्ठानहरूलाई अझ सबल बनाउने उद्देश्यका साथ सरकारले काम गरिरहेको जानकारी दिँदै ती संस्थामा पदाधिकारी नियुक्ति प्रक्रियालाई पारदर्शी बनाइने बताएकी छन्।

राष्ट्रियसभाको शनिबारको बैठकमा ‘प्रतिनिधिसभाबाट सन्देशसहित प्राप्त स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने, विधेयक, २०८३ लाई विचार गरियोस्’ भन्ने प्रस्ताव पेस गर्दै स्वास्थ्य विज्ञान प्रतिष्ठानका पदाधिकारी नियुक्ति प्रक्रियालाई पारदर्शी र  प्रतिस्पर्धी बनाइने बताइन्।

स्वास्थ्य तथा खाद्य स्वच्छता मन्त्री मेहताले प्रस्तुत गर्नुभएको सो प्रस्तावलाई सभाले सर्वसम्मतिले स्वीकृत गरेको छ। त्यसअघि सांसदहरू रेणु चन्द, वासुदेव घिमिरे, मीना सिंह  धर्मेन्द्र पासवान, विष्णुबहादुर विश्वकर्मा, सोमनाथ पोर्तेलले विधेयकका सैद्धान्तिक पक्षमा आफ्ना धारणा प्रस्तुत गरेका थिए।