‘डिफेन्डिङ च्याम्पियन’ अर्जेन्टिनालाई पहिलो पटक विश्वकप खेलेको केप भर्डले आच्छु आच्छु पारेपछि...

एजेन्सी : विश्वकप फुटबलको नकआउट चरणमा डिफेन्डिङ च्याम्पियन अर्जेन्टिना पहिलो पटक सहभागिता जनाएको केप भर्डविरुद्ध हारको सङ्घारबाट जोगिँदै अत्यन्तै कठिन जित दर्ता गरेको छ।

मियामीमा भएको खेलमा फिफा वरीयताको ६४औं स्थानमा रहेको केप भर्डले बलियो अर्जेन्टिनालाई अतिरिक्त समयसम्म आच्छुआच्छु पारेको थियो।

अन्ततः अतिरिक्त समयमा भएको एक आत्मघाती गोलको मद्दतले अर्जेन्टिना ३-२ ले विजयी हुँदै अन्तिम १६ मा त पुग्यो, तर खेलको अन्तिम सेकेन्डसम्म पनि अर्जेन्टिनी खेलाडी र समर्थकहरूमा हारको डर स्पष्ट देखिन्थ्यो।

विश्वकप इतिहासकै सबैभन्दा ठूलो उलटफेर गर्ने उद्देश्यले मैदान उत्रिएको केप भर्डले साविक विजेतालाई खेलभरि नै दबाबमा राख्यो।

खेलको २९औं मिनेटमा कप्तान लियोनेल मेस्सीले उत्कृष्ट गोल गर्दै अर्जेन्टिनालाई सुरुवाती अग्रता दिलाएका थिए। यो मेस्सीको विश्वकप इतिहासकै २०औं गोल थियो।

तर, पहिलो पटक विश्वकप खेलिरहेको केप भर्डले दबाबमा नआई ५९औं मिनेटमा डेरोय डुआर्टेको गोलमार्फत खेललाई १-१ को बराबरीमा ल्यायो।

डुआर्टेले अर्जेन्टिनी डिफेन्डर लिसान्ड्रो मार्टिनेज र गोलकिपर एमिलियानो मार्टिनेजलाई बिट गर्दै गरेको प्रहार गोलमा परिणत हुँदा अर्जेन्टिनाको डिफेन्स लाइनको कमजोरी प्रस्टै देखिएको थियो।

निर्धारित ९० मिनेटको खेल १-१ को बराबरीमा सकिएपछि खेल अतिरिक्त समयमा धकेलियो। अतिरिक्त समयको सुरुवातमै अर्थात् ९२औं मिनेटमा लिसान्ड्रो मार्टिनेजले उत्कृष्ट गोल गर्दै अर्जेन्टिनालाई पुनः २-१ को अग्रता दिलाए।

अर्जेन्टिनाले जित सुनिश्चित भएको ठानेको थियो, तर केप भर्डले हार मानेन। १०३औं मिनेटमा सिड्नी लोपेस काब्रालले डी-बक्स बाहिरबाट प्रहार गरेको लोभलाग्दो कर्लिङ सट सिधै पोलको माथिल्लो कुनामा गोलमा परिणत भयो। यस गोलले रङ्गशालामा उपस्थित हजारौँ अर्जेन्टिनी समर्थकहरूलाई स्तब्ध बनाइदियो।

खेल २-२ को स्थितिमा रोमाञ्चक मोडमा पुगेको बेला १११औं मिनेटमा अर्जेन्टिनाको भाग्यले साथ दियो। मेस्सीको कर्नरमा क्रिस्टियन रोमेरोको हेडर केप भर्डका डिफेन्डर डिने बोर्गेसको शरीरमा ठोक्किएर आत्मघाती गोल हुन पुग्यो।

यही आत्मघाती गोल नै अन्ततः खेलको निर्णायक गोल साबित भयो। त्यसपछि पनि खेलको अन्तिम मिनेटहरूमा केप भर्डले गोलका केही उत्कृष्ट अवसरहरू सिर्जना गरेको थियो, तर गोलकिपर एमिलियानो मार्टिनेजले उत्कृष्ट बचाउ गर्दै अर्जेन्टिनाको लाज जोगाए।

नतिजा अर्जेन्टिनाको पक्षमा रहे पनि प्रदर्शनका हिसाबले साविक विजेताको खेल फितलो देखियो। खेल सकिँदा अर्जेन्टिनी खेलाडीहरूको अनुहारमा जितको खुसीभन्दा पनि ठूलो दुर्घटनाबाट जोगिएको राहत स्पष्ट देखिन्थ्यो।

अब अर्जेन्टिनाले अन्तिम १६ मा इजिप्टको सामना गर्नेछ, तर रक्षापङ्क्तिमा सुधार नगर्ने हो भने अर्जेन्टिनाका लागि आगामी यात्रा सहज हुने छैन। अर्कोतर्फ, पराजित भए पनि केप भर्डले आफ्नो प्रदर्शनले विश्वभरका फुटबल प्रेमीहरूको मन जित्न सफल भयो।