पहिरोले हुम्लाको नेप्कामा विद्यालय भवन र गोठ बगायो, क्षतिको विवरण आउन बाँकी

हुम्ला : हुम्लाको चङ्खेली गाउँपालिका–५ नेप्का गाउँमा गएराति असिनापानीसँगै खसेको पहिरोले चङ्खेली–५ डाँफेस्थित आधारभूत विद्यालयको भवन पूर्ण रूपमा क्षतिग्रस्त भएको छ।

स्थानीय बासिन्दा छक्कबहादुर तामाङका अनुसार पहिरोले विद्यालय भवनका साथै स्थानीयको खेतीयोग्य जग्गा र गोठहरू समेत बगाएको छ।

चङ्खेली–५ वडाध्यक्ष हर्कधन तामाङ र धनसिंह तामाङका गोठ पनि पहिरोले पुरेको छ। त्यहाँ रहेका भेँडाबाख्रामा क्षति पुगेको छ। पहिरोले गोठ पुरिए पनि के कति क्षति भयो भन्ने एकिन विवरण प्राप्त नभएको जिल्ला प्रहरी कार्यालयका प्रमुख प्रहरी नायब उपरीक्षक शङ्कर खड्काले जानकारी दिए।

उनले प्रहरी टोली पहिरो प्रभावित स्थलतिर प्रस्थान गरिसकेको बताए। हुम्ला सदरमुकाम सिमकोटदेखि उत्तरपूर्वमा रहेको चङ्खेली गाउँपालिकाको तल्लो पाली, माथिल्लो पाली, पिप्लाङ र नेप्का गरी चार गाउँ रहेका छन्। गाउँपालिकाको केन्द्र पिप्लाङभन्दा निकै टाढा रहेको नेप्का गाउँ पुग्न करिब पाँच घण्टा पैदल यात्रा गर्नुपर्छ।