गोठाटारको नागेश्वर मन्दिरमा १० लाख नगदसहितको बाकस चोरी
काठमाडौं : कागेश्वरी मनोहरा नगरपालिका–९ गोठाटारमा रहेको नागेश्वर महादेव मन्दिरमा चोरी भएको छ।
शनिबार राति मन्दिरको भेटी राखिएको बाकस चोरी भएको मन्दिर संरक्षण तथा व्यवस्थापन समितिका अध्यक्ष प्रकाश रायमाझीले जानकारी दिए।
आज बिहान पूजा गर्ने क्रममा पुजारीले भेटीको बाकस नदेखेपछि खोजी गर्दा कतै नपाइएकाले चोरी भएको जानकारी प्राप्त भएको उनले बताए।
बाकस महाशिवरात्रि पर्वपछि नखोलिएकाले त्यसमा करिब आठदेखि १० लाख रहेको अनुमान गरिएको छ। मन्दिरको सुरक्षाका लागि यहाँ राखिएको प्रहरी बिट गत भदौको जेनजी आन्दोलनपछि हटाइएको थियो। समितिले प्रहरी बिट पुनःस्थापनाको माग गर्दै आएको थियो।
पशुपति क्षेत्रस्थित गौचरणमा रहेको नागेश्वर मन्दिर त्रिभुवन अन्तरराष्ट्रिय विमानस्थल विस्तारका क्रममा गोठाटारमा स्थानान्तरण गरिएको हो।
वैशाख २७, २०८३ आइतबार १०:२९:४१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
