इरानमा दुई जनालाई फाँसीको सजाय, इस्लामिक गणतन्त्र ढाल्ने षडयन्त्रमा दोषी ठहर

एजेन्सी : इरानले प्रतिबन्धित विपक्षी समूहसँग आबद्ध रहेको र राज्यविरुद्ध सशस्त्र विद्रोहको प्रयास गरेको अभियोगमा शनिबार दुई जनालाई मृत्युदण्ड दिएको छ।

इरानी न्यायपालिकाको आधिकारिक वेबसाइट ‘मिजान अनलाइन’का अनुसार अबोलहसन मोंटाजेर र वहिद बानियामेरियनलाई शनिबार फाँसी दिइएको हो।

उनीहरूलाई अदालतले दोषी ठहर गरेपछि सर्वोच्च अदालतले सजायको फैसलालाई अनुमोदन गरेको थियो। उनीहरुविरुद्ध इस्लामिक गणराज्यलाई ढाल्ने लक्ष्य राखेका कार्यमा संलग्न रहेको आरोप थियो।

उनीहरूलाई ‘धेरै आतङ्ककारी कार्यमार्फत विद्रोह गर्ने प्रयास’ मा दोषी ठहर गरिएको थियो। साथै, उनीहरू प्रतिबन्धित समूह ‘पिपुल्स मुजाहिदिन अफ इरान’ का सदस्य थिए र इस्लामिक गणराज्यलाई ढाल्ने विभिन्न विध्वंसकारी कार्यमा संलग्न रहेको पाइएको थियो।

यो फाँसीको घटना यसअघि यसै हप्तामा समूहका अन्य चार सदस्यलाई फाँसी दिइएको घटनासँग जोडिएको छ। समूहले प्रारम्भमा सन् १९७९ को इस्लामिक क्रान्तिको समर्थन गरेको थियो, तर १९८० को दशकमा नेतृत्वसँग टाढा परेको थियो। त्यसपछि तेहरानले यसलाई आतङ्ककारी समूहको रूपमा घोषणा गरेको छ।

इरान विश्वमा चीनपछि सबैभन्दा धेरै फाँसी दिने देशको रूपमा मानिन्छ। यस वर्ष सुरु भएको युद्धपछि पनि विभिन्न व्यक्तिहरूलाई फाँसी दिइएको छ। यसै चैतमा प्रहरी अधिकृतको हत्या गरेको आरोपमा तीन जनालाई फाँसी दिइएको थियो। 

साथै, इजरायलका लागि जासुसी गरेको आरोपमा इरान-स्वीडेन दुवै नागरिक कुरुष केवानीलाई पनि चैतमा फाँसी दिइएको थियो, जसले स्वीडेन र युरोपेली संघको कडा आलोचना सामना गर्नुपरेको थियो।

इरान-अमेरिका-इजरायल युद्धको पृष्ठभूमिमा यी घटनाहरू भएका हुन्। अमेरिकी-इजरायली हमलाले फेब्रुअरी २८ मा इरानको सर्वोच्च नेताको मृत्यु गराएको थियो र त्यसपछि क्षेत्रीय द्वन्द्व व्यापक बनेको थियो।