सात जिल्लाका चार सय त्रियानब्बे उम्मेदवारको जमानत जफत
काठमाडौं : यही फागुन २१ गते सम्पन्न प्रतिनिधिसभा सदस्य निर्वाचनमा देशका विभिन्न सात जिल्लाका ४९३ जना उम्मेदवारको जमानत जफत भएको छ।
काठमाडौंका १० वटा निर्वाचन क्षेत्रका २२६ जना उम्मेदवारको जमानत जफत भएको जिल्ला निर्वाचन कार्यालयका निर्वाचन अधिकारी ठाकुरप्रसाद भट्टराईले जानकारी दिए। एमाले, नेपाली कम्युनिष्ट पार्टी र राष्ट्रिय जनमोर्चा, उज्यालो नेपाल पार्टी, श्रम संस्कृति पार्टीसहित स्वतन्त्र उम्मेदवारको जमानत जफत भएको छ।
काठमाडौं क्षेत्र १ मा एमालेका उम्मेदवार मोहनराज रेग्मीसहित २६, क्षेत्र नम्बर २ मा राममणि फुयाँलसहित २५, क्षेत्र नम्बर ३ मा एमालेका उम्मेदवार रामेश्वर फुयाँलसहित १९, क्षेत्र नम्बर ४ मा २५ जना उम्मेदवारको जमानत जफत भएको हो।
यसैगरी, काठमाडौं-५ मा एमालेका उम्मेदवार ईश्वर पोखरेलसहित २२ जनाको जमानत जफत भएको छ। काठमाडौं-६ मा १७, क्षेत्र नम्बर ७ मा २६, क्षेत्र नम्बर ८ मा २१, क्षेत्र नम्बर ९ मा २२ र क्षेत्र नम्बर १० मा २३ जना उम्मेदवारको जमानत जफत भएको हो। प्रतिनिधिसभा सदस्य उम्मेदवार बनेका उनीहरुले धरौटीबापत १० हजार निर्वाचन कार्यालयमा बुझाएका थिए।
प्रतिनिधिसभा सदस्य निर्वाचन ऐन, २०७४ को दफा ७१ ९१० बमोजिम कुल सदर मतको १० प्रतिशत मत प्राप्त गर्न नसक्नेले धरौटीबापत बुझाएको रकम जफत गरिन्छ।
यसैगरी, कास्की–१ मा १४, कास्की–२ मा १४ र कास्की–३ मा १२ जना उम्मेदवारको धरौटी जफत भएको छ।
दाङमा ५१ जना उम्मेदवारको जमानत जफत भएको छ। प्रदेश निर्वाचन कार्यालयका सूचना अधिकारी गेहेन्द्र कवँरका अनुसार दाङ क्षेत्र नम्बर १ मा नेपाली कम्युनिष्ट पार्टीका उम्मेदवार मेटमणी चौधरी, एमालेका उम्मेदवार रेवतीरमण शर्मा, स्वतन्त्र उम्मेदवार कुलप्रसाद केसीसहित १२ जना उम्मेदवारको जमानत जफत भएको छ।
एमालेबाट दाङ १ मा उम्मेदवार बनेका रेवतीरमण शर्मा, लुम्बिनी प्रदेशका पूर्वमुख्यमन्त्री कुलप्रसाद केसीसहित सोही निर्वाचन क्षेत्रका १२ जनाको जमानत जफत भएको छ। त्यसैगरी, क्षेत्र नम्बर २ मा २० जनाको जमानत जफत भएको छ।
यसैगरी, इलाममा १८ जनाको धरौटी जफत भएको छ। दुईवटा निर्वाचन क्षेत्र रहेको इलाममा पहिलो हुने निर्वाचित हुने प्रणालीअन्तर्गत क्षेत्र नम्बर १ मा १३ उम्मेदवारमध्ये आठ र क्षेत्र नम्बर २ मा १४ उम्मेदवारमध्ये एक स्वतन्त्रसहित १० जनाको जमानत जफत भएको हो।
जमानत जफत हुनेहरुमा राष्ट्रिय प्रजातन्त्र पार्टीका ज्वाला नेपाल, नेपाल मजदुर किसान पार्टीका तुल्सीकेशरी प्रजापति, मङ्गोल नेसनल अर्गनाइजेसनका बुद्धलाल मेचे, नेपाल जनमुक्ति पार्टीका डम्बरसिंह लिम्बू, सङ्घीय लोकतान्त्रिक राष्ट्रिय मञ्चका रामप्रसाद लिम्बू, नेपाल कम्युनिष्ट पार्टी (माओवादी)का नारदमणि साङपाङ, उज्यालो नेपाल पार्टीका हरिबहादुर गुरुङ र जनता समाजवादी पार्टीका लिलाबहादुर सुनुवारको जमानत जफत भएको हो। यसैगरी, क्षेत्र नम्बर २ मा १० जनाको जमानत जफत भएको छ।
यसैगरी, भोजपुरमा सात जना उम्मेदवारको जमानत जफत छ। बागलुङ क्षेत्र नम्बर १ मा राष्ट्रिय जनमोर्चासहित आठ उम्मेदवारको जमानत जफत भएको छ।
राष्ट्रिय जनमोर्चा केन्द्रीय अध्यक्ष एवं पूर्वउपप्रधानमन्त्री चित्रबहादुर केसीले समेत जमानत जफत भएको सहायक निर्वाचन अधिकृत पूर्णप्रसाद शर्माले जानकारी दिए।
रूपन्देहीमा १४३ उम्मेदवारको जमानत जफत भएको छ भने ललितपुरमा ६३ जना उम्मेदवारको धरौटी जफत भएको छ।
ललितपुरमा राजनीतिक दलका ४० र २३ जना स्वतन्त्र उम्मेदवारको जमानत जफत भएको ललितपुरका मुख्य निर्वाचन अधिकृत पुनाराम खनालले जानकारी दिए।
फागुन २६, २०८२ मंगलबार १३:३९:२२ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
