प्रभु बैंकको सिइओसहित तीन उच्च अधिकारी पक्राउ, कर्जा दुरुपयोगमा अनुसन्धानका लागि सिआइबी हिरासतमा

काठमाडौँ : प्रभु बैंकका पूर्व अध्यक्ष देवी भट्टचन पक्राउ परेर हाजिर जमानीमा रिहा भएको १८ दिनपछि बैंकका प्रमुख कार्यकारी अधिकृत (सिइओ) अशोक शेरचनसहित उच्च व्यवस्थापनका तीन जना अधिकारी आइतबार पक्राउ परेका छन्। प्रहरी अनामनगरस्थित बैंकको केन्द्रीय कार्यालयमा गएर सिइओ शेरचन, उप-सिइओ मणिराम पोखरेल र प्रमुख जोखिम अधिकृत रिवास श्रेष्ठलाई पक्राउ गरेर हिरासतमा राखेको छ।

प्रहरीको केन्द्रीय अनुसन्धान ब्युरोले यी तीनै जनाविरुद्ध उच्च अदालत पाटनबाट पक्राउ अनुमति लिएर पक्राउ गरेको जनाएको छ। उनीहरूको पक्राउको कारण भने खुलाइएको छैन। यसअघि बैंकका पूर्वअध्यक्ष देवीप्रकाश भट्टचनमाथि करिब एक अर्ब रुपैयाँ अपचलन गरेको विषयमा अनुसन्धानका लागि पक्राउ परेका थिए।

देवीप्रकाशको पक्राउको कारण प्रभु म्यानेजमेन्टसँग जोडिएको थियो। प्रभु मेनेजमेन्टले प्रभु मनी ट्रान्सफरको सुपर एजेन्टको रूपमा काम गर्दा विभिन्न सहकारीबाट ग्यारेन्टीको रूपमा रकम र भुक्तानी गर्नु पर्ने रकम मिलान नगरी अपचलन गरेको र हिसाब बरबुझारथ नगरेको भन्दै मेनेजमेन्टकी अध्यक्ष कुसुम लामाले दायर गरेको ठगीसम्बन्धी जाहेरीको अनुसन्धानका लागि कात्तिक ११ गते भट्टचन पक्राउ परेका थिए। उनी अदालतको आदेशमा कात्तिक २४ मा हाजिर जमानीमा रिहा भए।

सिआइबीको अनुसन्धानमा प्रभु बैंकबाट प्रभु मेनेजमेन्टमा गएको २७ करोडको कर्जा दुरुपयोग भएको देखिएको थियो। त्यसमा अशोकसहितका उच्चतहका पदाधिकारी जोडिएका थिए। आइतबार तीन जना पक्राउ पर्नुको कारण ठगी, आपराधिक विश्वासघात, आपराधिक लाभ तथा नेपाल राष्ट्र बैंक ऐनअन्तर्गतका कसुर देखिएको छ। आइतबार पक्राउ परेका मणिराम यस अगाडि पनि बैंकले जारी गर्ने ऋणमा ऋण लिनेसँग पाँच प्रतिशतसम्म कमिसन लिने घटनामा जोडिएका थिए। उकेराले प्रमाणसहित सार्वजनिक गरे पनि नेपाल राष्ट्र बैंकले कारबाहीको साटो उल्टो संरक्षण गरेको थियो।

एकै दिन बैंकका तीन जना उच्चपदस्थ पदाधिकारी पक्राउ परेपछि मात्रै नेपाल राष्ट्र बैंक सक्रिय भएको छ। आइतबार नेपाल राष्ट्र बैैंकको सक्रियतामा बैंक जोखिममा नपरोस् भनेर वरिष्ठतामा अगाडि रहेका नीरज लम्साललाई बोर्ड बैठकले निमित्त कार्यकारी प्रमुखको जिम्मेवारी तोक्यो।