नाम र पहिचान त्यागेर रास्वपामा विलय भयो विवेकशील साझा : कोही मक्ख, कोही ठुस्स परेका एकीकरण सभाका १३ तस्बिर

काठमाडौं : वैकल्पिक राजनीतिको प्रारम्भकर्ताको रूपमा परिचित विवेकशील अभियान साझा पार्टीमा विलय भएसँगै अभियानै अलपत्र पर्यो। पार्टीका नेताहरू कोही अलग दल बनाउनतिर लागे। कोही राष्ट्रिय प्रजातन्त्र पार्टीतिर गए भने केही राष्ट्रिय स्वतन्त्र पार्टीतिर लागे।

रवीन्द्र मिश्र राप्रपामा गएसँगै वैचारिक मतभेद समाधान गर्दै मिलन पाण्डेसहितको समूह पून विवेकशील साझामा फर्किएर समीक्षा बास्कोटाको नेतृत्वमा पार्टीलाई सक्रिय गराउने प्रयास गरे पनि पार्टी पुरानो लयमा फर्कन सकेन। २०७९ को स्थानीय तहको निर्वाचनहुँदै प्रदेश अनि प्रतिनिधि सभाको निर्वाचनमा पार्टीको उपस्थिति छ/छैन बराबरै भयो।

उता वैकल्पिक दलको अवधारणामा बनेको रास्वपा पहिलो प्रयासमै प्रतिनिधि सभामा चौथो दलको रूपमा उदाए पनि नेतृत्वमा रहेकाहरूको विवादित पृष्ठभूमिका कारण सङ्कटमा फस्दै गयो।

पार्टी सभापति रवि लामिछाने निष्क्रिय नागरिकता, दोहोरो राहदानीहुँदै सहकारी ठगीको मुद्दामा पुर्पक्षका लागि कारागारमै पुगेपछि पार्टीको गति नै बदलियो।

कार्यवाहक सभापति डीपी अर्याल वैदेशिक रोजगारीको आवरणमा ठगीमा मुछिए। दलका अन्य नेताहरू पनि सहकारी ठगीको अनुसन्धानको दायरामा तानिए।

जेनजी आन्दोलनले पुराना दल दबाबमा परेपछि नयाँ दलहरू जन्मनेक्रम सुरु भएसँगै रास्वपाले आफ्नो प्रभाव बढाउन नयाँलाई प्रवेश गराउने र पुराना दलहरूसँग एकीकरण गर्ने प्रयास गर्यो। कुलमान घिसिङसहितको समूहलाई पार्टीमा प्रवेश गराउन निकै कसरत गरेको दलका नेताहरुको मिहेनतले काम नगरे पनि अन्तमा राजनीतिक रूपमा अस्तित्व जोगाउनै सङ्कटमा परिरहेको विवेकशील साझाको केही नेताहरू भने दलको नाम, चुनाव चिन्ह लगायतका सबै अस्तित्व नै छाडेर रास्वपामा विलय हुन सहमत भए। त्यही सहमति अनुसार आइतबार एकीकरण कार्यक्रम राखेर विवेकशील साझाको एक समूह रास्वपामा विलय भए।

आइतबार पार्टी अध्यक्ष बास्कोटा, उपाध्यक्ष प्रकाशचन्द्र परियार अनि रञ्जु दर्शनासहितका नेताहरू रास्वपामा समाहित भए। यस अगाडि नै विवेकशीलका विराजभक्त श्रेष्ठ र पुकार बम रास्वपामा प्रवेश गरिसकेका थिए।

तर आइतबारको कार्यक्रमबाट विवेकशील अभियानमा सक्रिय र अध्यक्ष समेत भइसकेका मिलन पाण्डे भने एकतामा सहभागी भएनन्। उनले केही समय कुलिङ पिरियडमा बस्ने र केही दिनमै नयाँ राजनीतिक अभियान सुरु गर्ने घोषणा गरे।

एकीकरण अभियानमा कुनै समय विवेकशील अभियानको ब्रान्ड अनुहार बन्न सफल भएकी रञ्जुले आफूहरू रास्वपामा पदका लागि झगडा गर्न नभई काम गर्न आएको दाबी गरिन्। उनले काम गर्नकै लागि पार्टी एकीकरणमा नाम, पहिचान सबै छाड्न तयार भएको दाबी गरेकी थिइन्।

विवेकशील साझामा रहँदा सामाजिक सञ्जालमा रवि लामिछाने र सहकारी ठगीबारे तिखा टिप्पणी गर्न सक्रिय रञ्जुले आइतबार भने सहजै उनको नेतृत्व स्वीकार गरेको बताइन्।