एकीकरण सभामा उज्ज्वल र रवि सम्झिएर भावुक भए विराज

काठमाडौं : विवेकशील साझा पार्टी र राष्ट्रिय स्वतन्त्र पार्टीको एकीकरण सभामा बोल्नेक्रममा नेता विराजभक्त श्रेष्ठ निकै भावुक देखिए। उनले मञ्चबाट बारम्बार विवेकशील अभियानका संस्थापक उज्ज्वल थापा र राष्ट्रिय स्वतन्त्र पार्टीका सभापति रवि लामिछानेलाई सम्झिए।

थापा सुसंस्कृत र वैकल्पिक राजनीति सम्भव छ भन्ने नेपालमा वैकल्पिक राजनीतिको सूत्रधार रहेको र रवि त्यसलाई अगाडि बढाउने नेता भएको तर यी दुवै अहिले यी दुवै दलको एकीकरण कार्यक्रममा नभएको भन्दै उनी भावुक भएका थिए।

कोरोनाकालमा उज्ज्वल थापाको मृत्यु भएको थियो भने रवि सहकारी ठगीको अभियोगमा पुर्पक्षका लागि थुनामा छन्।

उज्ज्वल थापाले नै आफूलाई राजनीतिमा सहभागी गराएको भन्दै उनले नै सुरु गरेको अभियान अहिले आएर सही बाटोमा थियो भन्ने पुष्टि भएको बताए।

उनले विवेकशीलको संस्थापकको मृत्यु भएको र रास्वपाका सभापति राजनीतिक प्रतिशोधका कारण जेलमा रहेको भन्दै उनले वर्तमान सरकारलाई रविमाथि लागेको आरोपबारे निष्पक्ष छानबिन गरिदिन आग्रह गरेका थिए।

ढिला न्याय दिनु भनेको पनि न्याय नदिनु हो भन्दै उनले रविमाथिको अन्याय भएको दाबी गरिरहे। उनले नेपाल खुल्ला छ भनेर उज्ज्वल थापाले सुरु गरेको अभियान नै रास्वपाले अगाडि बढाएको दाबी समेत गरे।

रास्वपाले आफ्नो आधिकारिक दस्ताबेजमै विवेकशील अभियानलाई सम्बोधन गरेको भन्दै दुवै पार्टीको कार्यशैली र लक्ष्य एकै भए पनि अलग अलग रूपमा अभियान अगाडि बढाउँदा केही कमजोरी भए पनि अब एकै मञ्चमा आएकोमा खुसी व्यक्त गरे।

उनले सम्बोधनमा पार्टी उपसभापति स्वर्णिम वाग्लेलाई पनि पटक पटक सम्बोधन गरे। रास्वपालाई राजनीतिक रूपमा अस्पष्ट दलको रूपमा आलोचना हुने गरेको र वाग्ले रास्वपाका आएपछि पार्टी आफ्नो राजनीतिक अजेण्डामा स्पष्ट भएको भन्दै धन्यवाद दिएका थिए।

विराजले विवेकशीलबाट राजनीति सुरु गरेर उनी बागमती प्रदेशको प्रदेश सांसद भएका थिए। २०७९ मा उनी विवेकशील छाडेर स्वतन्त्र रूपमा काठमाडौं क्षेत्र नम्बर ८ मा उम्मेदवार बनेर जितेपछि रास्वपाका सहभागी भएका थिए।