चार वर्षदेखि अलपत्र कोशी अस्पताल, केसी एन्ड रमण कन्स्ट्रक्सनले सकेन काम

विराटनगर : निर्माण सुरु भएको चार वर्षसम्म पनि विराटनगरस्थित कोशी अस्पतालको भवन अझै सकिएको छैन। दुई अर्ब ४५ करोड लागतको ११ तले भवनको ३५ प्रतिशत मात्र निर्माणको काम सकिएको छ भने ३८ करोड लागतको चार तले भवनको पनि ६० प्रतिशत मात्र काम सम्पन्न भएको छ।

 २०७८ असार २३ गते सम्झौता गरी २०८० पुस २२ मा निर्माण सम्पन्न गर्ने गरी ३० महिने ठेक्का सम्झौता भएको थियो।  निर्माण व्यवसायी केसी एवं रमण कन्स्ट्रक्सनले करिब चार वर्षअघि निर्माण सुरु गरे पनि दुवै भवनको निर्माणको काम सकिएको छैन।

आइतबार विराटनगर पुगेका जलस्रोत तथा ऊर्जा, भौतिक पूर्वाधारमन्त्री कुलमान घिसिङले अस्पतालको निर्माणाधीन भवन तोकिएको समय सीमाभित्र तयार गर्न निर्देशन दिए।

उनले अस्पताल भवनको निरीक्षण गरेर मन्त्री घिसिङले निर्माणाधीन अवस्थामा रहेका दुई वटा भवन निर्धारित समयमै तयार गरी हस्तान्तरण गर्न निर्माण व्यवसायीलाई निर्देशन दिए।

बिरामीको चापलाई हेरेर निर्माण प्रक्रिया सुरु भएको अस्पतालको नयाँ भवन बनाउने काम ढिलो भएको भन्ने गुनासो आएको भन्दै उनले अस्पताल प्रशासन र निर्माण व्यवसायीलाई काम छिटो सक्न निर्देशन दिए।

कोशी अस्पतालका प्रमुख डा रुणा झा र सङ्घीय सहरी विकास तथा भवन निर्माण कार्यालय विराटनगरका डिभिजनल इन्जिनियर सुरेन्द्र साहले मन्त्री घिसिङलाई अस्पतालको वस्तुस्थिति र भवन निर्माणसम्बन्धी जानकारी गराएका थिए।