रुपन्देही बन्यो ‘हस्पिटालिटी हब’ : ४ पाँचतारे होटल सञ्चालनमा, साढे १३ अर्ब लगानी

बुटवल : रुपन्देहीमा सञ्चालनमा आएका पाँचतारे होटलमा मात्र साढे १३ अर्ब रुपैयाँ लगानी भएको छ। विदेशी पर्यटकलाई अन्तर्राष्ट्रिय स्तरको सेवा दिने उद्देश्यले जिल्लामा चार वटा पाँचतारे होटल सञ्चालनमा छन्। यी सबै पाँचतारे होटलमा अन्तर्राष्ट्रिय चेन ब्रान्ड जोडिएका छन्।

लुम्बिनी प्रदेशकै पहिलो ‘टाइगर रिसोर्ट’ सबैभन्दा बढी लगानीमा सञ्चालनमा आएको पाँचतारे होटल हो। अष्ट्रेलियाली कम्पनी सिल्भर हेरिटेज ग्रुपको लगानीमा बनेको रुपन्देहीको तिलोत्तमास्थित टाइगर प्यालेस रिसोर्ट अहिले नयाँ व्यवस्थापनका साथ सञ्चालनमा छ।

कुल १५ बिघा क्षेत्रफलमा फैलिएको यस रिसोर्टमा नेपालकै सबैभन्दा ठूलो क्यासिनो समेत छ। रिसोर्ट सञ्चालनको केही समयपछि व्यावसायिक साझेदारबीच मनमुटावका कारण लगानीकर्ता सिल्भर हेरिटेज ग्रुपले रिसोर्ट बन्द गरेको थियो।

त्यसपछि गैरआवासीय नेपालीहरूले अमेरिकामा स्थापना गरेको ‘हिमालयन टाइगर इन्भेष्टमेन्ट इंक’ मार्फत सिल्भर हेरिटेजको सबै सेयर खरिद गरी रिसोर्ट पुनः सञ्चालनमा ल्याइएको छ। रिसोर्टमा १०२ वटा विभिन्न श्रेणीका कोठाहरू छन्।

त्यस्तै, विश्व शान्तिको मुहान शाक्यमुनि बुद्धको जन्मस्थल लुम्बिनी क्षेत्रमा स्थापित ‘लुम्बिनी हेरिटेज लिमिटेड’ नामक पाँचतारे होटलको व्यवस्थापन सम्हाल्ने गरी ‘इन्टरकन्टिनेन्टल होटेल्स ग्रुप’ (आइएचजी) ‘क्राउन प्लाजा’ नेपाल फर्किएको छ।

होटलका प्रबन्ध निर्देशक अनिल श्रेष्ठका अनुसार होटलमा विश्वस्तरीय आतिथ्यता सेवा प्रदान गर्ने सम्बन्धमा आइएचजी र लुम्बिनी हेरिटेजबीच हालै भारतको नयाँ दिल्लीमा द्विपक्षीय सम्झौता भइसकेको छ।

पाँच वर्षअघि काठमाडौंस्थित होटल सोल्टीसँगको व्यवस्थापन सम्बन्धी सम्झौताको अवधि सकिएपछि क्राउन प्लाजा नेपालबाट बाहिरिएको थियो। लुम्बिनी हेरिटेजका अध्यक्ष सुभाष अमात्य र आइएचजीका दक्षिण पश्चिम एसिया क्षेत्रका प्रबन्ध निर्देशक सुदीप जैनले भारतको नयाँ दिल्लीमा यससम्बन्धी द्विपक्षीय सम्झौता पत्रमा हस्ताक्षर गरिसकेका छन्। सम्झौता अनुसार लुम्बिनी हेरिटेजले अब ‘क्राउन प्लाजा लुम्बिनी’को नामबाट विश्वस्तरीय आतिथ्यता सेवा प्रदान गर्नेछ।

आइएचजीको अन्तर्राष्ट्रिय मुख्यालय बेलायतमा रहेको छ। यसले संसारभरका आठ हजारभन्दा बढी विश्वस्तरीय होटल एण्ड रिसोर्टको व्यवस्थापन तथा स्तरोन्नतिको कार्य गर्दै आएको छ। लुम्बिनीस्थित मायादेवी मन्दिरबाट १.९ किलोमिटरको दूरीमा रहेको यो पाँचतारे होटलमा २ अर्ब ५० करोड रुपैयाँ लगानी भएको छ।

लुम्बिनी हेरिटेजका अध्यक्ष सुभाष अमात्यले आइएचजीसँगको साझेदारीमा लुम्बिनीमा क्राउन प्लाजा होटल सञ्चालनमा ल्याउन पाउँदा आफूहरूले गौरवको अनुभूति गरेको बताए।

‘आइएचजीको विश्वव्यापी विशेषज्ञता र क्राउन प्लाजा ब्रान्डको शक्तिले लुम्बिनी क्षेत्रमा आतिथ्यता सेवाको मानकलाई नयाँ उचाइमा पुर्याउने तथा व्यापार र बिदा मनाउन आउने अतिथिहरू दुवैका लागि प्रिमियम गन्तव्य सिर्जना गर्ने विश्वास लिएका छौं,’ उनले भने।

होटलमा कुल १४७ कोठा, ७ सुइट, रेष्टुरेन्ट, स्विमिङ पुल, फिटनेस सेन्टर लगायतका आधुनिक सुविधा छन्। करिब ६ महिनाभित्र क्यासिनो पनि सञ्चालनमा ल्याउने तयारी छ। होटलले २०० भन्दा बढी जनशक्तिलाई प्रत्यक्ष रोजगारी दिनेछ। स्वदेशी र विदेशी पाहुनालाई आकर्षित गर्न विभिन्न प्याकेज सञ्चालन गर्ने योजना छ।

त्यस्तै, बुटवलमा साढे तीन अर्बको लगानीमा पाँचतारे होटल ‘हायात प्लेस’ सञ्चालनमा आएको छ। २५ कट्ठा क्षेत्रफलमा बनेको १० तले भवनमा अत्याधुनिक सुविधासहित १०९ कोठा रहेको यो होटल हालै मात्र सञ्चालनमा आएको हो। यहाँ ३५० जनाले रोजगारी पाएका छन्। सुरुमा ‘होटल सेफ्रोन’का नाममा निर्माण सुरु भए पनि निर्माण सम्पन्न भएपछि अन्तर्राष्ट्रिय होटल चेन ‘हायात प्लेस’ ब्रान्डमा सञ्चालनमा आएको हो। 

हायात ब्रान्ड सन् २००६ मा सुरु भई अहिले संसारभर ४२० भन्दा बढी स्थानमा फैलिएको छ। यसमा रुपन्देहीको अग्रणी औद्योगिक घरानाका चुन्नुप्रसाद पौडेल, कमल किशोर मालपानी, नरिश्वर शर्मा पौडेल, भूमिराज पौडेल, श्रवण बेरिवाल र रेखा मालपानी गरी ६ जनाले संयुक्त रूपमा लगानी गरेका छन्।

त्यस्तै, खाजा घरबाट व्यवसाय थालेको सिद्धार्थ ग्रुपले २५ वर्षको अन्तरालमा पाँचतारे होटल सञ्चालनमा ल्याएको छ। २५ वर्षअघि अर्थात् २३ माघ २०५४ मा टीकापुरमा खाजा पसल सञ्चालन गरेको सिद्धार्थ ग्रुपले रुपन्देहीमा पाँचतारे होटल सञ्चालनमा ल्याएको हो। यो सफलताका प्रमुख सूत्रधार चिन्तामणि न्यौपाने ‘लक्ष्मण’ हुन्। 

भैरहवा अञ्चलपुर प्रहरी चेकपोस्टदेखि दुई सय मिटर पश्चिमतिर मायादेवी गाउँपालिका- ८ मा २ वर्षदेखि सञ्चालनमा आएको पाँचतारे होटल ‘सिद्धार्थ भिलासा’ चार बिघा क्षेत्रफलमा फैलिएको छ। होटलमा डिलक्स, एक्जुकेटिभ स्विट, स्विट र प्रेसिडेन्ट स्विट गरी चार स्तरमा वर्गीकरण गरिएका ८५ वटा कोठाहरू छन्।

साढे दुई अर्बभन्दा धेरै रुपैयाँ लगानीमा निर्माण भएको पाँचतारे होटल सिद्धार्थ भिलासामा तीन सय जनाभन्दा बढीले रोजगारी पाएका छन्। होटलमा लबी लाउन्ज, अल डे डाइनिङ, रुफ टप रेस्टुरेन्ट तथा स्विमिङ पुल, फिटनेस, स्पा, साउना, ज्याकुजीसहितको हेल्थ क्लब सेवा, गार्डेन, सभा हल, ३ वटा कन्फरेन्स हल तथा क्यासिनो सञ्चालनमा छ।