पाकिस्तानले किन गर्‍यो गाजामा सेना पठाउने कुरा ?

एजेन्सी : पाकिस्तानले गाजामा शान्ति स्थापनाका लागि प्रस्तावित ‘इन्टरनेसनल स्टेबलाइजेसन फोर्स’ (आईएसएफ) मा आफ्नो सेना पठाउन तयार रहेको संकेत दिएको छ। तर, उसले यस मिसनमा हमासलाई निःशस्त्र पार्ने जिम्मा भने नलिने स्पष्ट पारेको छ।

उपप्रधान तथा विदेशमन्त्री मोहम्मद इशाक डारले शनिबार इस्लामाबादमा आयोजित पत्रकार सम्मेलनमा प्रस्तावित आईएसएफबारे पाकिस्तानको आधिकारिक धारणा सार्वजनिक गरेका हुन्। बीबीसी र एपीपीका अनुसार, उनले पाकिस्तानको सहभागिताका लागि निम्न मुख्य विषयहरू स्पष्ट हुनुपर्ने बताएका छन् :

हमासको निःशस्त्रीकरणमा असहमति : अन्य प्रमुख राष्ट्रहरू जस्तै पाकिस्तान पनि गाजामा हमासका लडाकुहरूलाई निःशस्त्र पार्ने काममा सहभागी हुनेछैन। पाकिस्तान शान्ति चाहन्छ, तर यो विशिष्ट भूमिकाका लागि तयार छैन।

संयुक्त राष्ट्र सङ्घको स्वीकृति : पाकिस्तानी सेना तैनाथ गर्नुअघि उक्त योजनाले संयुक्त राष्ट्रसङ्घीय सुरक्षा परिषद्को पूर्ण स्वीकृति पाएको हुनुपर्छ।

स्पष्ट कार्यादेश (म्यान्डेट) : शान्ति सेनाको भूमिका के हुने, नियम तथा सर्तहरू के रहने र उनीहरूको कार्यादेश के हुने भन्ने विषयमा स्पष्टता नभएसम्म पाकिस्तानले अन्तिम निर्णय लिने छैन।

पाकिस्तान गाजामा शान्ति सेना पठाउन सकारात्मक देखिए पनि उसका सर्तहरू पूरा नभए र मिसनको उद्देश्य स्पष्ट नभए सहभागी नहुने स्पष्ट पारेको छ।