विवादित अभिव्यक्तिबारे प्रधानमन्त्री कार्कीको प्रष्टोक्ति, के भनेकी थिइन् त्यस्तो ?

काठमाडौं : लैंगिक हिंसाविरुद्धको १६ दिने अभियानको उद्घाटन समारोहमा दिएको अभिव्यक्ति विवादित बनेपछि प्रधानमन्त्री सुशीला कार्कीले प्रष्टोक्ति दिएकी छन्। मुस्लिम समुदाय र ऐतिहासिक सन्दर्भबारे उनले राखेको धारणामा आलोचना भएपछि प्रधानमन्त्री कार्कीले आइतबार सामाजिक सञ्जालमार्फत प्रष्टोक्ति दिएकी हुन्।

उनले आफ्नो नियत कुनै समुदायलाई चोट पुर्याउने नरहेको प्रष्ट पारेकी छन्। प्रधानमन्त्री कार्कीले भनेकी छन्, 'लैंगिक हिंसाविरुद्धको १६ दिने अभियान शुभारम्भका क्रममा मैले दिएको अभिव्यक्तिमा रहेर विभिन्न टिप्पणी भएका रहेछन्। कुनै पनि धर्म वा समुदायलाई होच्याउने मेरो आशय र नियत होइन, छैन।'

समाजमा उत्तेजना फैलाउने वा सद्भाव बिग्रने ढंगले व्याख्या नगर्न आग्रह गर्दै उनले भनेकी छन्, 'सबै धर्मप्रति मेरो उत्तिकै सम्मान छ। शान्ति, सद्भाव र सहिष्णुता कायम राख्न सबैमा विनम्र अनुरोध छ।'

प्रधानमन्त्री कार्कीले के भनेकी थिइन् ?

लैंगिक हिंसाविरुद्धको १६ दिने अभियानको उद्घाटन समारोहमा प्रधानमन्त्री सुशीला कार्कीले दिएको अभिव्यक्तिप्रति मुस्लिम समाजले आपत्ति जनाएको थियो। उनको अभिव्यक्तिले मुस्लिम समुदायको आत्मसम्मानमा गहिरो चोट पुगेको औँल्याउँदै फिर्ता लिन माग गरिएको थियो। 

प्रधानमन्त्री कार्कीले महिला हिंसाको ऐतिहासिक र सामाजिक सन्दर्भ कोट्याउने क्रममा मुस्लिम समुदायको व्यवहार र त्यसले हिन्दु समाजमा पारेको प्रभावबारे टिप्पणी गरेकी थिइन्। उनले भनेकी थिइन्, 'मुसलमानहरूको प्रवृत्ति-व्यवहार हेर्दा यति अन्यायपूर्ण देखिन्छ- जिउँदै लगेर महिलालाई गाड्ने, तान्ने, कतिपय मुस्लिम देशमा महिलालाई आजादी नदिने, पढ्न नदिने पनि देखिएको छ। पुराना अरेबियनहरूको सिस्टम हुन्छ, जहाँ मुसलमानहरूको प्रवृत्ति र उनीहरूको व्यवहार देख्छौं। यसो हेर्दा आजादी नदिने, पढ्न पनि नदिने देखिएको छ।’ 

तर, उनले कतिपय मुस्लिम देशहरूमा महिलाहरू डाक्टर बन्ने र सम्पत्तिमा बलियो हुने जस्ता उदारता देखिएको उल्लेख गरेकी थिइन्। प्रधानमन्त्री कार्कीले हिन्दु समाजमा महिलाहरूको अवस्था खस्कनुमा ऐतिहासिक कालमा भएका आक्रमणहरू जिम्मेवार रहेको तर्क गरेकी थिइन्। उनको भनाइ थियो, 'हिन्दु धर्ममा पहिले महिलाहरूमा एकदमै आजादी थियो, आर्यन महिलाहरूको समाज असाध्यै उदार थियो। तर, जब मुसलमानहरूले हमला गर्न थाले, त्यसपछि आर्यनहरूले पनि सात वर्षकी बच्चाको बिहे गर्ने र अरू कुराहरूलाई संकीर्ण बनाउँदै लगे।'

धर्मले महिलालाई पीडा देऊ नभने पनि ऐतिहासिक अभ्यासका क्रममा महिलाहरू प्रताडित हुँदै गएको उनको भनाइ थियो। यिनै विषयहरूमा सामाजिक सञ्जाल र विभिन्न क्षेत्रबाट प्रतिक्रिया आएपछि प्रधानमन्त्री कार्कीले आइतबार प्रष्टोक्ति दिएकी हुन्