एमाले ११औँ महाधिवेशन : नेतृत्वमा स्वस्थ प्रतिस्पर्धा र जबजको रक्षामा पोखरेलको जोड

काठमाडौं : एमाले वरिष्ठ उपाध्यक्ष एवं आसन्न पार्टीको ११औँ राष्ट्रिय महाधिवेशनमा अध्यक्ष पदका उम्मेदवार ईश्वर पोखरेलले नेतृत्व निर्माणको प्रक्रियालाई स्वस्थ र मित्रवत ढंगले अघि बढाउनुपर्ने बताएका छन्।

महाधिवेशनको सन्दर्भमा एक सन्देश जारी गर्दै उनले पार्टीको आन्तरिक जीवनलाई लोकतान्त्रिक बनाउँदै मुलुकको समृद्धिको अभियानलाई नेतृत्व गर्नुपर्नेमा जोड दिए। पोखरेलले ११ औँ महाधिवेशनले पार्टीको नीति र नेतृत्वका विषयमा महत्त्वपूर्ण निष्कर्ष निकाल्ने विश्वास व्यक्त गरे।

आगामी नेतृत्व चयनको विषयलाई विशेष प्राथमिकता दिँदै अध्यक्षका प्रत्याशी पोखरेलले लोकतान्त्रिक अभ्यासको वकालत गरे। उनले भने, 'नेतृत्व निर्माणमा स्वस्थ र मित्रवत प्रतिस्पर्धाको कुरालाई हामी अगाडि बढाउन चाहन्छौं। यो महाधिवेशनमा हामीले यी कामहरू गर्न सकौं भन्ने मेरो आग्रह छ।'

पोखरेलले एमालेले अंगीकार गरेको ‘जनताको बहुदलीय जनवाद’ (जबज) को रक्षा गर्दै पार्टी जीवनलाई थप लोकतान्त्रिक बनाउनुपर्ने बताए। उनले भनेका छन्, 'एमाले जनताको बहुदलीय जनवादको रक्षा र पार्टी जीवनको लोकतान्त्रिक पक्षलाई प्रभावकारी ढंगले अगाडि बढाउन चाहन्छ। यी काम गर्दै मुलुकमा समृद्धिको अभियानलाई अघि बढाउन चाहन्छ।'

सन्देशको क्रममा उनले महाधिवेशनका लागि देशभरबाट छनोट भएका प्रतिनिधिहरूको चर्चा गरे। कतिपय स्थानमा सर्वसम्मत र कतिपय स्थानमा प्रतिस्पर्धात्मक विधिबाट प्रतिनिधि छनोट भएको उल्लेख गर्दै उनले भने, 'दुवै तरिकाले प्रतिनिधि छनोट हुनुभएका कमरेडहरूलाई म हार्दिक बधाई ज्ञापन गर्न चाहन्छु। उहाँहरूले महाधिवेशनमा महत्त्वपूर्ण भूमिका निर्वाह गर्नुहुनेछ भन्ने मैले विश्वास लिएको छु।'