रूसी ‘छाया ट्याङ्कर’मा आक्रमण

एजेन्सी : टर्कीको कृष्ण सागर (ब्ल्याक सी) तट नजिकै रुसी तेल ओसार्ने ‘छाया फ्लीट’का दुई ट्याङ्करमा आक्रमण भएको छ। शुक्रबार दिउँसो भएको उक्त घटनामा ‘काइरोस’ र ‘विराट’ नामका दुई तेल ट्याङ्कर क्षतिग्रस्त भएका हुन्।

टर्कीका अधिकारीहरूले यी जहाजमा माइन, मिसाइल वा ड्रोनजस्ता बाह्य वस्तुबाट प्रहार भएको आशंका गरेका छन्। यद्यपि, दुवै जहाजमा रहेका चालक दलका सबै सदस्य सुरक्षित रहेको पुष्टि भएको छ।

टर्कीका यातायात तथा पूर्वाधारमन्त्री अब्दुलकादिर उरालोग्लुले प्रारम्भिक जाँचमा ‘बाह्य हस्तक्षेप’ देखिएको बताए। उनका अनुसार काइरोस जहाज समुद्री माइनमा ठोक्किएको हुन सक्ने र विराटमा भएको विस्फोट बाह्य आक्रमणको परिणाम हुन सक्ने सङ्केत मिलेको छ। मन्त्री उरालोग्लुले भने, 'बाह्य हस्तक्षेप भन्नाले माइन, मिसाइल वा ड्रोन हुन सक्छन्, तर यसको ठोस प्रमाण जुटिसकेको छैन।'

उनले विराट ट्याङ्करका क्याप्टेनले ‘ड्रोन आक्रमण’ भन्दै सङ्कट सन्देश पठाएको जानकारी पनि दिए। घटना लगत्तै सुरु गरिएको उद्धार कार्यबाट दुवै जहाजका गरी ४५ जनालाई सुरक्षित स्थानमा सारिएको छ। जसमा काइरोसका २५ र विराटका २० जना चालक दलका सदस्य छन्।

घटनास्थल र क्षति

समुद्री अधिकारीहरूका अनुसार गाम्बियाली झण्डा बोकेको काइरोस जहाज टर्कीको कोकेली तटबाट करिब २८ नटिकल माइल टाढा दुर्घटनामा परेको हो। उक्त जहाजमा आगलागी भएको र शनिबारसम्म पनि धुवाँ आइरहेको देखिएको छ। त्यस्तै, विराट जहाज तटबाट करिब ३५ नटिकल माइल टाढा क्षतिग्रस्त भएको छ। यद्यपि, विराटमा ठूलो आगलागी भने नभएको बताइएको छ। घटना टर्कीको विशेष आर्थिक क्षेत्रमा भएकाले थप जोखिम रोक्न टर्कीले क्षेत्रीय समकक्षीहरूसँग समन्वय गरिरहेको छ।

के हो ‘छाया फ्लीट’ र किन भयो आक्रमण?

क्षतिग्रस्त दुवै ट्याङ्कर अमेरिका, युरोपेली सङ्घ (इयु), बेलायत लगायतका मुलुकको प्रतिबन्ध सूचीमा छन्। ‘ओपनस्यान्कसन’का अनुसार यी जहाजहरू प्रतिबन्ध छल्दै रुसी तेल ओसार्ने ‘छाया फ्लीट’ का हिस्सा हुन्। यी जहाजले आफ्नो लोकेसन लुकाउन ‘अटोमेटिक आइडेन्टिफिकेसन सिस्टम’ बन्द गर्ने, बारम्बार झण्डा फेर्ने र स्वामित्वको संरचना जटिल बनाउने गरेका छन्।

युक्रेनले युद्धका क्रममा रुसी जहाजलाई लक्षित गरी समुद्री ड्रोन प्रयोग गर्दै आएको भए पनि त्यस्ता आक्रमण प्रायः उत्तरी कृष्ण सागरमा सीमित थिए। टर्कीको तटनजिकै भएको यो आक्रमण कसले र किन गर्यो भन्नेबारे अधिकारीहरूले कुनै निश्चित पुष्टि गरेका छैनन्।