जनताको आर्थिक तथा सामाजिक सुधार नभएकाले समस्या आइरहेको छ : अध्यक्ष यादव
जनकपुरधाम : जनता समाजवादी पार्टी (जसपा) नेपालका अध्यक्ष उपेन्द्र यादवले देशमा राजनीतिक परिवर्तन भइरहे पनि जनताको आर्थिक तथा सामाजिक सुधार नभएकाले पटक पटक समस्या आइरहेको बताएका छन्।
शनिबार जनकपुरमा दलित, पिछडा वर्ग, थारु आदिवासी र अल्पसङ्ख्यक (डोटिम) परिसङ्घको धनुषा जिल्लास्तरीय बृहत् अन्तरक्रियामा उनले आर्थिक, सामाजिक परिवर्तनविना राजनीतिक परिवर्तनले मात्र मुलुक समृद्ध हुन नसक्ने धारणा राखे।
अध्यक्ष यादवले अबको क्रान्ति आर्थिक र सामाजिक रूपान्तरणका लागि हुनुपर्ने उल्लेख गर्दै त्यसका लागि डोटिम परिसङ्घ अगाडि बढ्नुपर्ने आवश्यकता औँल्याए। 'समाजको पिँधमा रहेका वर्ग र समुदायको अवस्थामा परिवर्तन नभएसम्म राजनीतिक परिवर्तनको कुनै अर्थ नहुने रहेछ। समाजमा रहेको विकृति विसङ्गतिको अन्त्य र आर्थिक सामाजिक रूपान्तरणले मात्रै लोकतन्त्रलाई बलियो बनाउँछ,' उनको भनाइ थियो।
उनले दलित, पिछडा वर्ग, अल्पसङ्ख्यकहरू छुट्टाछुट्टै लडेर समानताको अधिकार पाउन नसक्ने भन्दै एकजुट भएर लड्नका लागि अपिल गरे।
मंसिर १३, २०८२ शनिबार २२:१५:१३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
