प्रधानमन्त्री सुशीला कार्कीसँग राप्रपा नेताहरूको भेट, पूर्व राजासहित दल र जेनजीको सर्वपक्षीय सम्मेलनको माग

काठमाडौं : राष्ट्रिय प्रजातन्त्र पार्टीका नेताहरूले शनिवार प्रधानमन्त्री सुशीला कार्कीलाई भेटेर निर्वाचन अगाडि पूर्व राजासहित दल र जेनजी समूहको सर्वपक्षीय सम्मेलन गर्न माग गरेको छ।

पार्टी अध्यक्ष राजेन्द्र लिङदेनको नेतृत्वमा गएको टोलीले पाँच बुँदे ज्ञापन पत्र बुझाउँदै पुन आन्दोलन गर्न नपर्ने वातावरण निर्माण गर्न पूर्व राजासहितको सर्वपक्षीय सम्मेलनको माग गरेको हो।

राप्रपाले पेस गरेका अन्य बुँदाहरू भने जेनजी सम्बन्धित छ। ज्ञापन पत्रमा २०८२ भदौ २३ र २४ गते भएको जेनजी विद्रोह र त्यस पश्चात् निर्माण भएको वर्तमान सरकार केवल २०८४ सालमा हुनुपर्ने आवधिक संसदीय निर्वाचन २०८२ सालमा गर्नको लागि मात्रै भएको र नबनेको उल्लेख छ।

२०८२ फागुन २१ गते सम्पन्न हुने भनिएको आम निर्वाचन अगावै वर्तमान सरकारबाट तत्काल आगामी निर्वाचन अगावै मुलुकको वर्तमान समस्याको दीर्घकालीन र स्थायी समाधानका लागि कोही कसैले भविष्यमा आन्दोलन गर्नु नपर्ने परिस्थिति निर्माणका लागि 'राजा', राजनीतिक दल र जेन्जी लगायतका सम्मिलित सर्वपक्षीय सम्मेलनको आयोजनाबाट देशलाई निकास दिने काम होस् भनिएको छ।

आगामी निर्वाचनमै अन्तर जिल्ला र विदेशबाट मतदान गर्न पाउने सुनिश्चितता गर्न सम्भव रहेको र त्यसलाई सुनिश्चित गरेर मात्रै निर्वाचन प्रक्रियालाई अगाडि बढाउन, जेनजी प्रदर्शनमा सहभागी भएकै कारण देशका विभिन्न भागमा भएको प्रदर्शनका सहभागीहरूलाई पक्रने, मुद्दा लगाउने जस्ता कामहरू रोक्न समेत माग गरिएको छ।

 जेनजी आन्दोलनका सहिद परिवार, घाइतेहरूको माग अविलम्ब पुरा गर्न र  सरकारसँग विभिन्न मागहरू लिएर प्रदर्शनमा रहेका र प्रधानमन्त्रीसँग भेट गर्न चाहेका जेनजीहरुमाथि भइरहेको दमन र उपेक्षा उपयुक्त नभएकाले यस प्रकारको कार्य तत्काल बन्द गरेर  वार्ता संवादबाट वातावरणलाई शान्त बनाउने प्रयास गर्न माग गरिएको छ।