कार्यवाहकमै नेतृत्वमा फ्लप भए पूर्णबहादुर, गल्दै निधी र सिटौला

काठमाडौं : महाधिवेशनबारे निर्णय गर्न दुई महिनादेखि बसिरहेको नेपाली कांग्रेसको केन्द्रीय समितिको बैठक सोमबार बोलाइएको छ। यस अगाडि बैठक बोलाउने र सार्ने गर्दै मंसिर १४ पुगेको थियो। शनिवार पुनः सूचना जारी गर्दै मंसिर १५ गते दिउसो २ बजे पुर्याइयो।

सोमबारको बैठकमा केन्द्रीय कार्यसमितिसँगै आमन्त्रित सदस्य र सातै प्रदेशको सभापतिलाई अनिवार्यरूपमा उपस्थित हुन भनिएको छ।

जेनजी आन्दोलनसँगै बढेको चुनौती सामना गर्न नेतृत्व परिवर्तनका लागि महाधिवेशनको एजेन्डासहित सुरु भएको पार्टी बैठकको प्रारम्भ गरेर सभापति शेरबहादुर देउवा उपचारका लागि सिंगापुर गएका थिए। उनले आफू सक्रिय राजनीतिमा नफर्कने भन्दै पूर्णबहादुर खड्कालाई कार्यवाहक दिएर गएका थिए।

तर उनी सिंगापुरमा एक महिना बसेर स्वदेश फर्कँदासमेत केन्द्रीय कार्य समितिबाट महाधिवेशनको निर्णय गराउन खड्का असफल भए। विशेष कि नियमित महाधिवेशन ?, निर्वाचन अगाडि कि पछाडि भन्ने विवाद लम्बिँदा खड्काले बैठक सारिरहे, तर सहमति गराउन सकेनन्।

त्यसपछि सहमतिका लागि देउवा आफै सक्रिय भइरहेका छन्। उनले शुक्रवार आफ्नो निवासमा विशेष महाधिवेशन मागिरहेका महामन्त्रीसहितको बैठक राखेर मंसिरभित्र महाधिवेशन गर्न भनेर आफू सिंगापुर गएको, तर पार्टीका नेता विवाद गरेर बसेको भन्दै पुस महिनाभित्र नियमित महाधिवेशन गर्न निर्देशन दिएका थिए।

महाधिवेशन सार्ने निधिसहितको खेल

पार्टी सभापतिका आकांक्षी कृष्णप्रसाद सिटौला, विमलेन्द्र निधी, प्रकाशमान सिंहसहितको समूह अहिले नियमित वा विशेष कुनै पनि महाधिवेशन हुन नदिने पक्षमा छन्।

निर्वाचन अगाडि दुईमध्ये कुनै महाधिवेशन भए आफूहरूको पक्षमा परिणाम नआउने उनीहरूको आंकलन देखिन्छ। तर मंसिर अन्तिमबाट वर्तमान कार्यसमितिको पदावधि सकिन्छ। कार्यसमितिले चाहेमा एक वर्ष म्याद थप्न सक्छ। उनीहरू म्याद थप्नुपर्ने पक्षमा छन्।

महामन्त्री गगन थापा र विश्वप्रकाश शर्मासहित युवा पंक्ति कुनै पनि हालतमा फागुन २१ अगाडि महाधिवेशन गरेर नयाँ नेतृत्वसहित निर्वाचनमा जाने पक्षमा छन्। पार्टीमा विशेष महाधिवेशनका लागि समेत लिखित प्रस्ताव आइसकेकाले नियमित अधिवेशन सम्भव नभए विशेष महाधिवेशन हुनु पर्ने उनीहरूको माग छ।

संस्थापन र इतरको आ-आफ्नै दाउ

निर्वाचन भए ताजा जनादेश, नभए त्यसपछिको राजनीतिक संकटको सामना गर्न नयाँ नेतृत्व आवश्यक देखिन्छ। जेनजी पुस्ताको धक्काले धर्मराएको दलको साख फर्काउन पनि नेतृत्व परिवर्तन अत्यावश्यक देखिन्छ।

तर पार्टीभित्र रहेका गुटअनुसारका नेता स्वार्थअनुसार सक्रिय छन्। जेनजी आन्दोलन अगाडि नै दलमा १५ औँ महाधिवेशनबाट पार्टीको नेतृत्वमा जान नेताहरू सक्रिय थिए। देउवा उत्तराधिकारीको खोजीमा थिए। पूर्णबहादुर, शशाङ्क कोइराला, विमलेन्द्र निधी, कृष्णप्रसाद सिटौला, प्रकाशमान सिंह देउवाको उत्तराधिकारी हुने प्रतिष्पर्धामा थिए। संस्थापनइतर समूहबाट शेखर कोइराला सभापतिका आकांक्षी थिए भने गगन थापाले पनि सभापतिको उम्मेदवारी घोषणा गरिसकेका थिए।

अनपेक्षित जेनजी आन्दोलनको धक्काले देशसँगै पार्टी र नेताको प्रभाव र भूमिकामा समेत प्रभाव पर्यो। युवा पुस्ताको नेतृत्वको माग उठ्दा गगन समूह बलियो देखियो। तत्काल महाधिवेशन गर्दा आफ्नो समूह फाइदामा हुने निष्कर्षसहित गगन-विश्वप्रकाश समूह तत्काल महाधिवेशनको पक्षमा लाग्यो। आफूहरू प्रतिकुल माहौल भएको भन्दै अन्य समूहका नेता महाधिवेशन धकेल्न लागे।

जेनजी आन्दोलनमा घरमै प्रदर्शनकारीबाट कुटिएपछि देउवाको भूमिका बदलियो। उनले सक्रिय राजनीतिबाट बिदा लिने घोषणा गरेर पूर्णबहादुरलाई नियमित महाधिवेशन गर्ने जिम्मेवारीसहित कार्यवाहक दिए। तर उनी फ्लप भए। पार्टी विवाद मिलाउन देउवा नै सक्रिय हुन बाध्य भए।