निर्वाचन बिथोल्न प्रतिगामी चलखेलको खतरा छ : नेकपा

काठमाडौं । नेपाली कम्युनिष्ट पार्टीले मुलुकमा तोकिएको समयमै निर्वाचन सम्पन्न गराउन सम्पूर्ण वामपन्थी, लोकतान्त्रिक र देशभक्त शक्तिहरूसँग विशेष अपील गरेको छ।

शनिबार एक अपील पत्र जारी गर्दै पार्टीले निर्वाचनलाई विभिन्न बहानामा बिथोल्ने प्रतिगामी चलखेलको जोखिम कायमै रहेको औँल्याएको छ।

अपील पत्रमा भनिएको छ, ‘विभिन्न बहानामा अराजकता फैलाउने, संविधान खारेज गर्ने, लोकतान्त्रिक दलका नेता-कार्यकर्तालाई हतोत्साहित गर्ने र निर्वाचन बिथोल्ने वा परिणामलाई आफ्नो अनुकूल बनाउने प्रतिगामी तथा प्रतिक्रियावादी षड्यन्त्रका सम्भावनाहरू अझै विद्यमान छन्।’

मुलुकलाई संवैधानिक मार्गबाटै परिवर्तनको दिशामा अघि बढाउन घोषित मितिमै निर्वाचन अपरिहार्य रहेको पार्टीको ठहर छ। अपीलमा थप भनिएको छ, ‘हाम्रो पार्टी संविधान, लोकतन्त्र, सामाजिक न्याय र राष्ट्रिय स्वाधीनताको रक्षार्थ साझा पहलकदमीका लागि सम्पूर्ण वामपन्थी, लोकतान्त्रिक र देशभक्त शक्तिहरूसँग विशेष आग्रह गर्दछ।’

राष्ट्रिय स्वाधीनता र जनताको आत्मनिर्णयको अधिकारको प्रश्न थप पेचिलो बन्दै गएको उल्लेख गर्दै नेकपाले राष्ट्रिय सहमति निर्माण गरी संवैधानिक बाटोबाटै जनआकांक्षा सम्बोधन गर्न जिम्मेवार पहलकदमी आजको आवश्यकता भएको जनाएको छ।