गोठ हिँडेकी ६५ वर्षीया वृद्धाको शव क्षतविक्षत अवस्थामा फेला
रामेछाप : रामेछापको मन्थली नगरपालिका-९, बाङ्गेसल्लामा शनिबार बिहान एक वृद्धाको शव क्षतविक्षत अवस्थामा फेला परेको छ।
स्थानीय ६५ वर्षीया गङ्गामाया तामाङको शव पुरानागाउँ-भटौली सडक खण्डअन्तर्गत बाङ्गेसल्ला पिपलडाँडामा घाँटी र शरीरका विभिन्न भागमा गम्भीर चोट लागेको अवस्थामा भेटिएको हो।
वडा सदस्य धनलाल तामाङका अनुसार मृतकको शरीरमा देखिएको चोट र प्रकृति हेर्दा उनलाई बाघ वा चितुवा जस्ता जंगली जनावरले आक्रमण गरेको हुन सक्ने स्थानीयले आशंका गरेका छन्।
घरमा एक्लै बस्दै आएकी उनी शुक्रबार साँझ गोठतर्फ गएकी थिइन्। उनको शव गोठभन्दा करिब १०० मिटर दूरीमा मन्थली नगरपालिका- ७ र ९ को सिमानास्थित बाङ्गेसल्ला पिपलडाँडा नजिकै भेटिएको थियो।
घटनाबारे सत्यतथ्य पत्ता लगाउन जिल्ला प्रहरी कार्यालय रामेछापको टोलीले अनुसन्धान सुरु गरेको छ।
मंसिर १३, २०८२ शनिबार १५:०३:२३ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
