किसानको लागत उठ्ने गरी अण्डाको नयाँ मूल्य तोकियो

नारायणगढ : चिसो मौसम सुरु भएसँगै खपतमा आएको वृद्धि र भारतीय सीमा नाकामा गरिएको कडाइका कारण नेपाली बजारमा अण्डाको मूल्य बढेको छ।

नेपाल लेयर्स कुखुरापालक सङ्घले किसानको लागत उठ्ने गरी आजदेखि लागू हुने नयाँ समर्थन मूल्य तोकेको हो।

सङ्घका अध्यक्ष विनोद पोखरेलका अनुसार शुक्रबार बसेको बैठकले अण्डाको उत्पादन तथा बजारको अवस्था विश्लेषण गर्दै नयाँ मूल्य निर्धारण गरेको हो।

किसानको लागतलाई आधार मानेर तय गरिएको नयाँ मूल्यसूची अनुसार अण्डाको भाउमा उल्लेख्य सुधार आएको छ।

नयाँ मूल्यसूची अनुसार एक्स एल साइजको प्रतिक्रेट​​​​​​​ ५ सय ६० रुपैयाँ, ठूलो साइजको ५ सय ४५ र मध्यम साइजको ५ सय ३० रुपैया र  सानो अण्डाको मूल्य प्रतिपेटी तीन हजार दुई सय ५० तोकिएको छ।

अध्यक्ष पोखरेलका अनुसार यो मूल्य अघिल्लो दरभन्दा प्रतिक्रेट ४० रुपैयाँले बढी हो।

भारतमा जारी निर्वाचनका कारण सीमामा कडाइ हुँदा र भारतमै अण्डा महँगो भएकाले अवैध आयात रोकिएको छ, जसले गर्दा नेपाली उत्पादनले उचित मूल्य पाएको हो।

पोखरेलले भने, ‘जाडोमा अण्डा खानुपर्छ भन्ने जनचेतना बढेसँगै यसको खपत स्वभाविक रूपमा बढेको छ।’

यसअघि गत साउनमा पनि अण्डाको मूल्य प्रतिक्रेट ५६० रुपैयाँ पुगेको थियो, तर बीचमा क्रमशः घट्दै गएको थियो। हाल बजारमा माग बढेसँगै मूल्यमा सुधार आएपछि किसानले राहत महसुस गर्ने सङ्घले जनाएको छ।