एनएमबि बैंक र एनसीएचएलबीच सहकार्य

काठमाडौं : एनएमबि बैंकले नेपाल क्लियरिङ हाउससँगको सहकार्यमा ‘कार्डमा आधारित अनलाइन पेमेन्ट गेटवे’ सञ्चालनमा ल्याएको छ।

यो नयाँ सुविधासँगै बैंकले भौतिक मर्चेन्टहरूलाई जस्तै अनलाइन मर्चेन्टहरूलाई पनि सेवामा आबद्ध गराउन सक्नेछ।

यस सेवामार्फत बैंकका अनलाइन मर्चेन्टहरूले जुनसुकै राष्ट्रिय तथा अन्तर्राष्ट्रिय बैंकहरूबाट जारी भएका ‘भिसा’ र ‘मास्टर कार्ड’ मार्फत भुक्तानी प्राप्त गर्न सक्नेछन्।

नेपालमा ई-कमर्स कारोबारलाई प्रवर्द्धन गर्ने उद्देश्यले यो अनलाइन पेमेन्ट गेटवे सञ्चालनमा ल्याइएको बैंकले जनाएको छ।

यसमा ‘थ्री डी सेक्योर’ प्रविधि प्रयोग गरिएको छ, जसले ग्राहकको कार्डमार्फत हुने भुक्तानीलाई थप सुरक्षित बनाउनुका साथै अनधिकृत कारोबारको जोखिमलाई न्यूनीकरण गर्छ।

यो गेटवेले राष्ट्रिय तथा अन्तर्राष्ट्रिय दुवै प्रकारका भुक्तानीलाई सपोर्ट गर्ने भएकाले मर्चेन्टहरूलाई आफ्नो व्यवसायको दायरा विस्तार गर्न सहज हुने विश्वास लिइएको छ।

अनलाइन वा ई-कमर्समा आधारित व्यवसायीहरूले यो सेवा लिन बैंकसँग सम्पर्क गरी आवश्यक प्रक्रिया पूरा गरेपछि आफ्नो पोर्टलमा यो गेटवे ‘इन्टिग्रेट’ गर्न सक्नेछन्।

एनएमबि बैंकले यसअघि पनि एनसीएचएलसँगको सहकार्यमा आफ्ना ग्राहकहरूका लागि ईसीसी, आईपीएस, आरपीएस, नेपालपे क्यूआर, कनेक्टआईपीएस र कर्पोरेटपे जस्ता विभिन्न सेवाहरू प्रदान गर्दै आएको छ । अब यसमा ई–कमर्स पेमेन्ट गेटवेको सेवा पनि थपिएको हो।

एनसीएचएलले हाल १४ वटा बैंक तथा वित्तीय संस्थाहरूलाई डोमेस्टिक र विभिन्न अन्तर्राष्ट्रिय कार्ड कारोबार गर्न होस्टिङ, स्विचिङ र अनलाइन पेमेन्ट गेटवे लगायतका सेवाहरू प्रदान गर्दै आइरहेको छ। एनएमबि बैंकको यो सहभागितासँगै नेपालमा डिजिटल भुक्तानीको दायरा अझ फराकिलो हुने अपेक्षा गरिएको छ।

एनएमबि बैंकले हाल देशभर २०१ शाखा कार्यालय, १८७ एटीएम र ९ एक्सटेन्सन काउन्टरमार्फत सेवा प्रदान गर्दै आइरहेको छ।