मंसिरमा महाधिवेशन तयारी नगरी विवाद बढाएको भन्दै देउवाले भने “पुसभित्र नियमित महाधिवेशनको तयारी गर्नु”

काठमाडौं : नेपाली कांग्रेसभित्र महिनौँदेखि जारी महाधिवेशन सम्बन्धी विवाद समाधान गर्न शुक्रवार पार्टी सभापति शेरबहादुर देउवा निवासमा राखिएको बैठकमा सहमति हुन सकेन। बैठकमा पुसभित्र नियमित महाधिवेशन गर्नेबारे देउवाले पार्टी उपसभापति पूर्णबहादुर खड्का, महामन्त्री गगन थापा र विश्वप्रकाश शर्मासहित नेता कृष्ण सिटौला र विमलेन्द्र निधिसँग छलफल गरेका थिए।

बैठकमा सभापति देउवाले मंसिरमै नियमित महाधिवेशन गर्न भन्दाभन्दै नभएको भन्दै आक्रोशित बनेका थिए। उनले मंसिरमा महाधिवेशन गरेर नेतृत्व छाड्न आफू तयार हुँदाहुँदै पनि पार्टीमा अनावश्यक विवाद बढाउने काम भएको भन्दै रिसाएका थिए।

बैठकमा सहभागी एक नेताका अनुसार देउवाले विधानले तोकेको समयभित्र महाधिवेशन गर्न भनेर आफू सिंगापुर गएको तर यता नेताहरू नै विवाद निकालेर केन्द्रीय समितिको बैठक लम्ब्याएर बसेको भन्दै असन्तुष्टि जनाएका थिए।

बैठकमा सहभागी दुई महामन्त्री थापा र शर्माले अब नियमित महाधिवेशन गर्न सम्भव नहुने भन्दै विशेष महाधिवेशनको पक्षमा आफ्नो धारणा राखेका थिए। दुवैले विशेष महाधिवेशन गर्दा पनि पार्टीको एकतामा फरक नपर्ने र पार्टी थप बलियो हुने धारणा राखेका थिए।

तर दुवै महामन्त्रीको प्रस्तावमा देउवा राजी भएनन्। उनले नियमित महाधिवेशन गरेरै नेतृत्व हस्तान्तरणका लागि आफू तयार भएको र नेताहरू पनि तयार हुनुपर्ने बताए। उनले मंसिरमै नियमित महाधिवेशन गर्नु भन्दाभन्दा पनि विवाद बढाएको भन्दै अब पुस महिनाभित्रमा नियमित महाधिवेशन गर्न प्रस्ताव राखेका थिए।

देउवाले पुस महिनाभित्रमा नियमित महाधिवेशन गर्न बैठकमा प्रस्ताव राखेपछि अर्का नेता विमलेन्द्र निधिले प्रतिवाद गर्दै यो हुन नसक्ने बताए। उनले पुसमा नियमित महाधिवेशन गर्नेबारे निर्णय भए पनि नमान्ने चेतावनी नदिएपछि उनलाई देउवाले “पार्टी फुटाउन खोजेको” आरोप लगाएको एक नेताले बताए।

पार्टीलाई कमजोर बनाउनतिर नलाग्न चेतावनीदिँदै उनले पुसभित्रै नियमित महाधिवेशन गर्न सकिने भन्दै त्यही अनुसारको तयारी गर्न बैठकमा सहभागी नेताहरूलाई निर्देशन दिएका थिए। तर सहमति भने हुन सकेन।

बैठक स्रोतका अनुसार फास्टट्रयाकबाट काम गर्ने हो भने पुसभित्र महाधिवेशन सम्भव भएको भन्दै त्यसको प्रक्रियाबारे समेत छलफल भएको थियो। त्यसमा जिल्लामा प्रतिनिधि नपठाई निर्वाचन क्षेत्रमा प्रतिनिधि पठाउने, क्रियशिल सदस्यता नवीकरण र नाम पठाउन एक साताको समय दिने र एक सय ६५ निर्वाचन क्षेत्रबाट एक-एक जना केन्द्रीय प्रतिनिधि चयन गरेर महाधिवेशन गर्नेबारे छलफल भएको थियो।

बैठकमा भएको छलफल अनुसार विशेष महाधिवेशनको माग गरिरहेको पक्षसँग छलफल गरेर प्रस्ताव फिर्ता गराउने र नियमित महाधिवेशनमा जानेबारे सहमति गर्न उपसभापति पूर्णबहादुर खड्कालाई जिम्मेवारी तोकिएको थियो। जिम्मेवारी अनुसार खड्काले विशेष महाधिवेशनको माग गरिरहेकाहरूलाई शनिवार छलफलमा बोलाएका छन्।