‘सिन्दुरे जात्रा’ : नाम सार्वजनिक, कलाकार गुमनाम

काठमाडौं : व्यवसायमा कीर्तिमान रच्न सफल फिल्म 'पूर्णबहादुरको सारङ्गी'का निर्देशक सरोज पौडेलले ‘सिन्दुरे जात्रा’ निर्माण गर्ने भएका छन्। उनको निर्माण टिमले शुक्रबार टाइटल अनाउन्समेन्ट टिजरमार्फत फिल्म निर्माणको घोषणा गरेका हुन्। 

२६ सेकेन्डको टाइटल अनाउन्समेन्ट टिजरमा फिल्मको टाइटल मात्रै रहेको छ। नाम अनुसारको फिल्म हो या अरू नै कुनै स्पष्ट जानकारी छैन। प्रभाकार श्रेष्ठको लगानी रहने यस फिल्मको कथा पनि निर्देशक पौडेलकै छ। 

फिल्मको कलाकारका बारेमा निर्माण पक्षले केही जानकारी खुलाएको छैन। यो फिल्मको कहिलेबाट र कहाँ छायांकन गरिने हो, त्यो पनि निर्माण पक्षले गोप्य नै राखेको छ। उनीहरूले फिल्मको नाम मात्रै बाहिर ल्याएका छन्। 

सारंगी फिल्म्सको प्रस्तुति रहेको यस फिल्मलाई आरआर फिल्मस्ले वितरण र  डिजिटल पार्टनरमा रूपमा ओएसआर रहेको छ। यसअघि निर्देशक पौडेलले ९ वर्षअघि फिल्म ‘मेन्टल’ निर्देशन गरेका थिए। 

पछिल्लो समय उनले ‘वेलकम टु हेम्जाकोट’,‘पूर्णबहादुरको सारङ्गी’ र ‘कोशेढुङ्गा’निर्देशन गरेका थिए। जुन फिल्म गत भदौ १२ गते प्रदर्शनमा आएको थियो। उनको फिल्म ‘पूर्णबहादुरको  सारङ्गी’बाहेक कुनै पनि फिल्मले लगानी उठाउन सकेका छैनन्।