दिपल गाडी उत्पादनका लागि चांगानले किन्यो हुन्डाईको चिनियाँ प्लान्ट

काठमाडौं : चिनियाँ अटोमोबाइल कम्पनी चांगानले चीनस्थित हुन्डाईको प्लान्ट खरिद गरेको छ।

चांगानले बेइजिङ हुन्डाईको चोङकिङस्थित कारखानालाई अधिग्रहण गरेको हो, जहाँ अब ‘दिपल’ ब्रान्डका सवारीसाधन उत्पादन गरिनेछ।

आफ्नो उत्पादन क्षमता अधिकतम सीमामा पुगेकाले चांगानले क्षमता विस्तारका लागि यो कदम चालेको हो।

‘द इकोनोमिक अब्जर्भर’ले प्लान्टको स्वामित्व परिवर्तनबारे समाचार सार्वजनिक गरेको केही दिनपछि दिपलले यसको आधिकारिक पुष्टि गरेको छ।

यो प्लान्ट पहिले बेइजिङ हुन्डाईका पाँच उत्पादन केन्द्रमध्ये एक थियो। सन् २०१५ मा निर्माण सुरु भई २०१७ अगस्टबाट उत्पादन थालेको यो प्लान्ट १८ लाख ७० हजार वर्ग मिटर क्षेत्रफलमा फैलिएको छ।

१.१ बिलियन डलर लगानीमा निर्माण भएको यस कारखानाको वार्षिक उत्पादन क्षमता तीन लाख युनिट रहेको छ। यद्यपि, यो प्लान्ट सन् २०२१ को डिसेम्बरदेखि बन्द अवस्थामा थियो।

हाल दिपलका विद्युतीय सवारीसाधन (इभी) नानजिङ र बेइजिङस्थित प्लान्टमा उत्पादन हुँदै आएका छन्। अब चोङकिङको नयाँ प्लान्ट थपिएसँगै कम्पनीको उत्पादन क्षमता र बजार प्रभाव विस्तार हुने अपेक्षा गरिएको छ।

पछिल्लो रिपोर्ट अनुसार, यो वर्षको अक्टोबर महिनामा दिपल इभीको बिक्री अघिल्लो वर्षको तुलनामा ५७.१ प्रतिशतले वृद्धि भएको छ।

चांगानले दिपललाई विश्वबजारमा विस्तार गर्ने लक्ष्यसहित युरोप र दक्षिण अमेरिकामा आफ्ना मोडलहरू आक्रामक रूपमा बजारमा ल्याइरहेको छ।

हालै मात्र दिपलका एस-०५ र एस-०७ मोडल जर्मनी, बेलायत, फ्रान्स लगायतका युरोपेली मुलुकमा सार्वजनिक भएका थिए भने केही दिनअघि यो ब्रान्ड ब्राजिलमा पनि लन्च गरिएको थियो।