श्रीलङ्कामा बाढी-पहिरोको वितण्डा : ५६ जनाको मृत्यु, सरकारी कार्यालय र विद्यालय बन्द

कोलम्बो : श्रीलङ्कामा गत सातादेखि जारी भारी वर्षासँगै आएको बाढी र पहिरोका कारण ५६ जनाको मृत्यु भएको छ।

विपद्का कारण ६ सयभन्दा बढी घरमा क्षति पुगेपछि सरकारले शुक्रबार देशभरका सरकारी कार्यालय तथा विद्यालयहरू बन्द गर्ने निर्णय गरेको छ।

बिहीबारको मुसलधारे वर्षाले जनजीवन थप कष्टकर बनाएको छ। राजधानी कोलम्बोबाट करिब ३०० किलोमिटर पूर्वमा पर्ने मध्य पहाडी जिल्लाहरू बदुल्ला र नुवारा एलिया बाढी र पहिरोबाट सबैभन्दा बढी प्रभावित भएका छन्।

अधिकारीहरूका अनुसार यी क्षेत्रमा बिहीबार गएको पहिरोमा परी २५ जनाभन्दा बढीको ज्यान गएको छ।

सरकारको विपद् व्यवस्थापन केन्द्रले बदुल्ला र नुवारा एलिया क्षेत्रमा २१ जना बेपत्ता भएको र १४ जना घाइते भएको जनाएको छ। देशका अन्य स्थानमा पनि पहिरोका कारण मानवीय क्षति भएको छ। पूर्वी सहर अम्पारा नजिकै बाढीले कार बगाउँदा तीन यात्रुको मृत्यु भएको छ।

लगातारको वर्षाले नदी र जलाशयहरू भरिएका छन् भने सडक तथा रेलमार्गमा ढुङ्गा, माटो र रुखहरू खस्दा यातायात सेवा अवरुद्ध भएको छ। कतिपय स्थानमा रेल सेवा पूर्ण रूपमा रोकिएको छ।

बाढीका कारण घरको छतमा फसेका नागरिकहरूलाई श्रीलङ्काली वायु सेनाले हेलिकप्टरमार्फत उद्धार गरिरहेको छ। साथै, नौसेना र प्रहरीले डुङ्गाको प्रयोग गरी जोखिममा रहेका बासिन्दाहरूलाई सुरक्षित स्थानमा सार्ने कार्य जारी राखेका छन्।

मौसम अझै प्रतिकूल रहने र जोखिम कायम रहेको भन्दै अधिकारीहरूले सर्वसाधारणलाई उच्च सतर्कता अपनाउन आग्रह गरेका छन्।