अमेरिकामा कार्गो विमान दुर्घटना : तीन जनाको मृत्यु, ११ घाइते

एजेन्सी : अमेरिकाको केन्टकी राज्यस्थित लुईभिल विमानस्थलमा उडान भर्ने क्रममा यूपीएस कम्पनीको एउटा कार्गो विमान दुर्घटनामा परेको छ।

दुर्घटनालगत्तै विमानमा भीषण आगो लागेको थियो। यो घटनामा अहिलेसम्म तीन जनाको मृत्यु भएको पुष्टि भएको छ भने कम्तीमा ११ जना घाइते भएका छन्।

घाइतेहरूको अस्पतालमा उपचार भइरहेको छ, तर अझै केही व्यक्ति हराइरहेका छन्।

आगोको ज्वाला टाढाबाटै देखिएको थियो। आगलागीका कारण स्थानीय प्रशासनले विमानस्थल वरपरका बासिन्दालाई आफ्नो घरभित्रै रहन आग्रह गरेको छ।

अधिकारीहरूका अनुसार, विमानमा करिब ३८ हजार ग्यालन इन्धन थियो, जसका कारण विस्फोटपछि आगोले ठूलो रूप लिएको थियो। आगोले नजिकैका केही व्यापारिक भवनहरूमा पनि क्षति पुर्याएको छ।

यूपीएसले विमानमा चालक दलका तीन सदस्य रहेको जनाएको छ।

अमेरिकी संघीय उड्डयन प्रशासनका अनुसार, हवाईका लागि उडान भर्दै गरेको फ्लाइट नम्बर २९७६ स्थानीय समयअनुसार साँझ सवा सात बजे दुर्घटनाग्रस्त भएको थियो।

कात्तिक १९, २०८२ बुधबार ०८:२९:३९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।