तीन ठूला दलको केन्द्रीय समिति बैठक आज

काठमाडौं : तीन ठूला दलको केन्द्रीय समिति बैठक आज (मंगलबार) बस्दै छ। सत्तारुढ दल नेपाल कम्युनिस्ट पार्टी (नेकपा), प्रमुख प्रतिपक्षी दल नेपाली कांग्रेस र प्रतिपक्षी दल जनता समाजवादी पार्टी (जसपा) नेपालको बैठक बेग्लाबेग्लै समयमा बस्न लागेको हो। 

नेकपामा भने दुई पक्षले छुट्टाछुट्टै बैठक बोलाएका छन्। प्रधानमन्त्री एवं पार्टी अध्यक्ष केपी शर्मा ओलीले बिहान ९ बजे प्रधानमन्त्री निवास बालुवाटारमा आफू निकट केन्द्रीय सदस्यहरुको बैठक डाकेका छन्। 

यस्तै, अर्का अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल समूहले दिउँसो १ बजे आफूपक्षीय केन्द्रीय सदस्यहरुलाई बैठकमा बोलाएका छन्। 
ओली पक्षको बैठकले दाहाललाई कारबाही गर्ने र दाहाल नेपाल पक्षको बैठकले ओलीलाई कारबाही गर्ने बताइएको छ। 

प्रधानमन्त्रीको सिफारिसमा प्रतिनिधिसभा विघटन गरिएपछि नेकपाभित्रैबाट विरोध भइरहेको छ। उक्त कदमको दाहाल र नेपाल पक्षका नेताहरुले विरोध जनाएका छन्। 

संसद् विघटनको विरोध जनाउँदै आएको कांग्रेसले त्यसबारे पार्टीको आधिकारिक धारणा बनाउन आज दिउँसो १ बजे पार्टी कार्यालयमा केन्द्रीय कार्यसमिति बैठक राखेको छ।

यस्तै, जसपाले पनि आज मध्याह्न १२ बजे बस्ने केन्द्रीय कार्यकारिणी बैठक बोलाएको छ। बैठकबाट विरोधका कार्यक्रम घोषणा गरिने पार्टीले जनाएको छ।