दुई अमेरिकी युद्धपोत ‘स्ट्रेट अफ हर्मुज’बाट पार

एजेन्सी : इरानसँगको युद्ध सुरु भएयता पहिलो पटक दुई अमेरिकी युद्धपोतहरू रणनीतिक महत्वको 'स्ट्रेट अफ हर्मुज' पार गरेका छन्। 

अमेरिकी नौसेनाले ‘गाइडेड मिसाइल डिस्ट्रोयर’ मा कुनै समस्या नभोगीकन उक्त जलडमरूमार्गबाट पार गरेको ‘द वाल स्ट्रिट जर्नल’ले तीन अमेरिकी अधिकारीलाई उद्धृत गर्दै लेखेको छ।

ढुवानीका क्रममा तेहरानका अधिकारीसँग समन्वय नगरिएको उक्त अमेरिकी सञ्चार माध्यमले जनाएको छ। विश्वको कुल कच्चा तेलको करिब २० प्रतिशत ढुवानी हुने यस मार्गमा रहेका अवरोध हटाउन अमेरिकाले 'क्लियरिङ' अभियान सुरु गरेको राष्ट्रपति डोनाल्ड ट्रम्पले जनाएका छन्।

“हामी अब ‘स्ट्रेट अफ हर्मुज’ मा अवरोध हटाउने प्रक्रिया सुरु गर्दैछौं,” ट्रम्पले आफ्नो ट्रुथ सोसल प्लेटफर्ममा लेखका छन्, “यो चीन, जापान र फ्रान्स जस्ता देशहरूका लागि ‘उपकार’ हो। उनीहरूसँग यो काम आफैँ गर्ने साहस वा इच्छाशक्ति छैन।”

उनले द्वन्द्वमा इरानले ‘ठूलो घाटा व्यहोरेको’ बताए। राष्ट्रपति ट्रम्पले रणनीतिक जलडमरु भनिने हमुज घाँटीमा इरानी विस्फोटक पदार्थहरू बिच्छ्याइएका कारण विश्वको कच्चा तेलको करिब २० प्रतिशत ढुवानी हुने यस मार्गमा अझै पनि खतरा रहेको स्वीकार गरे।

ट्रम्पले लेख्नुभएको छ, “अझै पनि साँघुरो समुद्री मार्गमा जहाजहरूमाथि आक्रमण हुन सक्ने खतरा छ।” एएफपीले उक्त रिपोर्टबारे प्रतिक्रियाका लागि गरेको अनुरोधमा अन्य अमेरिकी अधिकारीहरूले तत्काल प्रतिक्रिया दिएका छैनन्।

संयुक्त राज्य अमेरिका र इजरायलले फेब्रुअरी २८ मा इरानमाथि बमबारी गर्न थालेपछि तेहरानले इरानको तटमा उसका शत्रुहरुका लागि मुख्य मार्ग लगभग अवरुद्ध गरेको छ, यद्यपि स्ट्रेट पुनः खोल्नु शनिबारदेखि सुरु भएको युद्धविराम वार्तामा राखिएको प्रमुख सर्त रहेको छ। 

इरानी सञ्चारमाध्यमका अनुसार मध्यपूर्वलाई हिंसामा परिणत गरेको र विश्व अर्थतन्त्रलाई स्तब्ध पारेको द्वन्द्व अन्त्य गर्ने प्रयासमा इरानी र अमेरिकी अधिकारीहरूले शनिबार पाकिस्तानमा वार्ता सुरु गरेका छन्। यसअघिको एक पोस्टमा राष्ट्रपति ट्रम्पले विश्वभरबाट ‘खाली ट्याङ्करहरू तेल किन्नका लागि’ अमेरिका गइरहेको बताएका थिए।