भाउजूको नाममा एसईई परीक्षा दिइरहेकी नन्द पक्राउ
सुनसरी : जिल्लाको भोक्राहा नरसिंह गाउँपालिका-४ स्थित श्री पृथ्वीनारायण माध्यमिक विद्यालय परीक्षा केन्द्रबाट एक नक्कली परीक्षार्थी पक्राउ परेका छन्।
विशेष सूचनाका आधारमा जिल्ला प्रहरी कार्यालयबाट खटिएको टोलीले माध्यमिक शिक्षा परीक्षा (एसइई) दिइरहेकी हरिनगर-६ का २० वर्षीया नुसरत खातुनलाई पक्राउ गरिएको हो।
जिल्ला प्रहरी कार्यालयका प्रहरी उपरीक्षक केशव थेबेले खातुनले आफ्नै भाउजू सलमा अजहरको नाममा जारी गरिएको प्रवेश पत्र लिएर परीक्षा दिइरहेको पाइएपछि पक्राउ गरिएको हो। पहिलो दिनदेखि नै लगातार परीक्षा दिँदै आएको भए पनि मंगलबार नियन्त्रणमा लिएको उनले जानकारी दिए।
भोक्राहा-२ स्थित जामिया इस्लामिया मदरसामा कक्षा १० मा अध्ययनरत सलमा हाल कतारमा रहेको जनाइएको छ। नक्कली परीक्षार्थी बनेर परीक्षा दिनु शिक्षा ऐन विपरीत भएकाले सोहीअनुसार खातुनलाई कारबाही हुने सुनसरीका प्रमुख जिल्ला अधिकारी वासुदेव घिमिरेले बताए।
चैत २४, २०८२ मंगलबार १६:१०:३४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
