६ वर्षअघि सम्झौता भएको चौकीडाँडा-फल्टुडे सडक अझै अलपत्र, निर्माण सुरु नभए अनिश्चितकालीन बन्द गर्ने स्थानीयको चेतावनी

धनगढी : कैलालीको चौकीडाँडा–फल्टूडे सडक खण्ड निर्माणमा ठेकेदारले ढिलासुस्ती गरेपछि स्थानीय पुनः आन्दोलित भएका छन्। लिखित सम्झौता गरेर पनि तोकिएको समयमा कालोपत्रे नगरिएको भन्दै स्थानीयले शनिबार सडक अबरुद्ध गरी विरोध जनाएका हुन्।

२०८१ फागुन मसान्तभित्र कालोपत्रे गरिसक्ने गरी जिल्ला प्रशासन कार्यालय कैलालीका तत्कालिन प्रमुख जिल्ला अधिकारी, निर्माण व्यवसायी र स्थानीयको छलफलपछि ठेकेदारले लिखित सहमति गरेका थिए। तर तोकेको समयमा काम सम्पन्न नभएपछि स्थानीयले फेरी सडक अबरुद्ध गरेका हुन्।

‘स्थानीय र जनप्रतिनिधिको आन्दोलन बिच भदौ २३ गते ठेकेदार सँग काम गर्ने समयसीमा तोकेर तमसुक नै बनाइएको थियो,’ कैलालीको गोदावरी नगरपालिका–१० का प्रेम महराले भने, ‘तर ठेकेदारले लिखित सम्झौताको वेवास्ता गरेको छ, सडक अहिले पनि अलपत्र छ, त्यसैले हामीले शनिबार एक दिन सडक अबरुद्ध गरेका छौं, काम सुरु नभए केही दिनमै अनिश्चितकालका लागि सडक अबरुद्ध गर्न हामी बाध्य हुने छौं।’

सुदूरपश्चिम प्रदेश पूर्वाधार विकास कार्यालय कैलालीमा पूर्वाधार विकास कार्यालय पहिलो पक्ष र ठेकेदार कम्पनी दोस्रो पक्ष रहने गरी गोदावरी नगरपालिकाका नगरप्रमुख, वडाध्यक्षको रोहबरमा समयसीमा तोकेर लिखित सहमति गरिएको उनले बताए।

सहमति अनुसार चौकीडाँडा फल्टुडे सडक अन्तरगतको अढाई किलोमिटर सडक निर्माणको ठेक्का पाएको सनलाइट थेगिम एडभेन्चर जेभीले फागुन ३० गतेभित्र सडक कालोपत्रे गर्ने सम्झौता गरेको थियो। 

आर्थिक वर्ष २०७६/०७७ देखि निर्माणको काम सुरु गरिरहेको उक्त कम्पनीले असोज ३० सम्म सब बेसको काम गर्ने, कार्तिक ३० सम्म बेसको काम गर्ने, मंसिर १५ सम्म पहिलो लेयरको कालोपत्रे गर्ने, फागुन ३० सम्म दोस्रो लेयरको कालोपत्रे गरेर चैत ३० सम्म अन्य काम सकेर हस्तान्तरण गर्ने सम्झौता भएको थियो।

तर, हाल उक्त कम्पनीले पहिलो लेयरको कालोपत्रेको आधा काम पनि गरेको छैन भने बाँकी सडक अझै धुलाम्मे अवस्थामै छ।

आर्थिक वर्ष २०७९/०८० देखि उक्त सडक निर्माणको काम सुरु गरेको तेडी निर्माण सेवाले पनि ३ किलोमिटर सडक कालोपत्रे गरेर पुस ३० मा हस्तान्तरण गर्ने लिखित सहमति गरेको थियो।

भदौ २३ मा भएको सहमति अनुसार असोज ३० सम्म सब बेसको काम गर्ने, कार्तिक ३० सम्म बेसको काम गर्ने, मंसिर १५ सम्म पहिलो लेयरको कालोपत्रे गर्ने, मंसिर ३० सम्म दोस्रो लेयरको कालोपत्रे गर्ने र पुस ३० मा हस्तान्तरण गर्ने सम्झौता भएको थियो। तर, उक्त कम्पनीले हालसम्म कालोपत्रेको काम सुरु समेत गरेको छैन।

सडक निर्माणमा चरम ढिलासुस्तीपछि सो सडक क्षेत्रमा पर्ने वडा नम्बर ३, १०, ११ र १२ का वडाध्यक्षहरूले भदौ १९ गते देखि सडकबाटै सेवा दिँदै चरणबद्ध आन्दोलनका कार्यक्रम गरेपछि पूर्वाधार विकास कार्यालय, ठेकेदार बिच लिखित सहमति भएको थियो।

तर, सहमति अनुसार काम नहुँदा जनप्रतिनिधिले पनि वास्ता नगरेको स्थानीयको भनाइ छ।

चौकिडाँडा फल्टुडे सडक अन्तरगत दुवै ठेकेदारले करिब साढे ५ किलोमिटर सडक अलपत्र पार्दा बर्खामा हिलाम्मे र सुख्खा मौसममा सडक धुलाम्मे हुने गरेको छ।

सडक निर्माणमा ठेकेदारले चरम लापरबाही गरेपछि सडक धुलाम्मे भएको भन्दै स्थानीयले शनिवार (चैत २१) सडक बन्द गरेका थिए। 

स्थानीय कृष्ण जोशीले सडक चाँडो निर्माण होस भनेर दबाव दिन सडक बन्द गरिएको बताए। उनले एक महिना अघिपनि दबाब दिँदा सडक निर्माणको काम सुरु गरिएको भए पनि पुनः ५/७ दिनमै ठेकेदार गायब भएको बताए। धुलाम्य सडकका कारण स्थानीयले सास्ती खेप्नु परेको उनको गुनासो छ।