बिरामी कैदीबन्दीको रोजाइमा चितवन कारागार

चितवन : स्वास्थ्य सेवाको उपलब्धताका कारण चितवन कारागार बिरामी कैदीबन्दीको पहिलो रोजाइमा पर्न थालेको छ। यहाँ रहेका क्यान्सर अस्पताल, भरतपुर अस्पताल र दुईवटा ठूला मेडिकल कलेजमा सहज रूपमा उपचार पाउने भएपछि उपचारका लागि कैदीबन्दीको रोजाइमा पर्ने गरेको हो ।

क्यान्सर रोग लागेका कैदीबन्दीको उपचारका लागि मुख्य रूपमा चितवन रोजाइ हुने गरेको भए पनि अहिले अन्य रोगका बिरामीको समेत रोजाइमा यस कार्यालय पर्ने गरेको छ। 

कार्यालयका प्रमुख रवीन्द्रप्रसाद ढुङ्गानाका अनुसार केही दिनअघिमात्रै केन्द्रीय कारागार नुवाकोटबाट तीन जना बिरामीलाई उपचारका लागि यहाँ पठाइएको छ। देशका विभिन्न जिल्लामा रहेका बिरामी कैदीबन्दी उपचारका लागि पहिलो रोजाइ काठमाडौँ र त्यसपछि चितवन हुने गरेको छ।

चितवन मध्यभागमा पर्ने भएकाले पनि यातायातको सहज सुविधा हुँदा बिरामीका आफन्तलाई समेत सहज हुने भएकाले यहाँ आउने गरेका हुन्। 

ढुङ्गानाका अनुसार हाल कारागारमा ११८ जना बिरामी कैदीबन्दी छन्। उच्च रक्तचापका ५४ बिरामी छन्। यस्तै मधुमेहका ३०, मानसिक रोगी १२, हेपाटाइटिस बी भएका पाँच, मुटुरोग, क्षयरोग, क्यान्सर, एचआइभी एड्स, छारेरोग लागेका तीन–तीन र थाइराइडका दुई जना बिरामी रहेका छन्।

उनले नियमित औषधि सेवन गर्नुपर्ने बिरामीका लागि औषधि खरिद गर्न पनि समस्या हुने गरेको बताए। यस आर्थिक वर्षमा औषधोपचार खर्चबापत १२ लाख विनियोजन भएको थियो। 

सरकारले विनियोजन गरेको औषधिको रकम अपुग भएर जनस्वास्थ्य कार्यालय, भरतपुर महानगरको स्वास्थ्य शाखा, औषधि व्यवसायीसँग सहकार्यमा औषधि व्यवस्थापन गर्दै आएको उनले जानकारी दिए।

यस कारागारमा ४१ महिलासहित ६७९ जना कैदीबन्दी रहेका छन्। एक जना आश्रित बालक रहेको उनले बताए। अहिले अस्पतालमा भर्ना भएर दुई जना कैदीबन्दीले उपचार गराइरहेका छन्। 

५०५ जनाको क्षमता रहेको यस कारागारमा ३० महिला र ४६५ पुरुष रहेको उनले बताए। जेनजी आन्दोलनका क्रममा भागेका ११० कैदीबन्दी भने अझै फर्किएका छैनन्।