गोरखा माइक्रोबस दुर्घटना अपडेट : सात भारतीयको मृत्यु

गोरखा : मनकामना दर्शन गरी फर्कँदै गरेको बेला माइक्रोबस दुर्घटनामा परि मृत्यु भएका यात्रुहरूको पहिचान खुलेको छ। 

सहिद लखन गाउँपालिका-३ कान्टारमा शनिबार बा.प्र.०१-००६ ख ८४३० नम्बरको यात्रुवाहक माइक्रोबस दुर्घटना भएको थियो। जिल्ला प्रहरी कार्यालयका प्रमुख भरतबहादुर विकका अनुसार दुर्घटनामा परी मृत्यु हुने सात जना भारतीय नागरिक छन्। 

भारतका करिब ५८ वर्षीय मुतु कुमार, ५८ वर्षकै अनामलिक, ५९ वर्षकी मीनाक्षी, ५३ का सिवगामी, ५७ वर्षका विजायल, ५८ वर्षकी मीना र ६० वर्षका तमिलारसीको घटनास्थलमा नै मृत्यु भएको छ।

मनकामना दर्शन गरेर फर्केका १६ जना भक्तजन सवार विद्युतीय माइक्रोबस दुर्घटनामा परेको हो। सडकखण्डबाट करिब २०० मिटर तल खसेको माइक्रोको ब्रेक फेल भएर दुर्घटना भएको हुनसक्ने जनाइको छ। 

प्रहरी प्रमुख विकका अनुसार घटनाका घाइतेलाई उद्धार गरी थप उपचारका लागि पुरानो मेडिकल कलेज चितवन लगिएको छ। ६२ वर्षका सोरनम, ६५ वर्षका मङ्गदा जलम, ७५ वर्षकी सुभाद्रा, ६५ वर्पकी मायाल, ७३ वर्षकी सरोजा, ७५ वर्षकी भाग्यलक्ष्मी र ३४ वर्षकी मीनाक्षीको उपचार भइरहेको र अवस्था गम्भीर रहेको प्रहरीले जनाएको छ।

चालक लमजुङको बेँसीसहर नगरपालिका-१ का ४६ वर्षका पुष्प मल्ल ठकुरी सकुशल छन् भने सहचालक बेँसीसहर नगरपालिका-३ का २९ वर्षका सन्तोष गुरुङ घाइते छन्। घटनाबारे थप अनुसन्धान भइरहेको प्रहरीको भनाइ छ।