नारायणगढ–मुग्लिन सडकको तुइन खोलामा ‘फ्लड लाइट’ जडान : अब रातको समयमा पनि पहिरो र ढुङ्गा खसेको टाढैबाट देखिने
चितवन : नारायणगढ–मुग्लिन सडकखण्डअन्तर्गत अत्यन्तै जोखिमपूर्ण मानिने तुइन खोला क्षेत्रमा ‘फ्लड लाइट’ जडान गरिएको छ। सडकमा माथिबाट ढुङ्गा र पहिरो खस्ने जोखिम बढेपछि रातको समयमा पनि स्पष्ट देख्न सकिने गरी दुईवटा फ्लड लाइट जडान गरिएको हो।
सडक डिभिजन भरतपुरका सबइन्जिनियर हरिकुमार श्रेष्ठका अनुसार शनिबार उक्त ठाउँमा विद्युत् प्राधिकरणसँगको समन्वयमा दुईवटा फ्लड लाइट जडान गरिएको छ। तुइन खोला क्षेत्रमा पहिरो र ढुङ्गा खस्न सक्ने जोखिमलाई मध्यनजर गर्दै रातको समयमा पनि स्पष्ट देखिनेगरी फ्लड लाइट जडान गरिएको श्रेष्ठले बताए।
लाइट जडानपछि पहिरो झरेको र ढुङ्गा खसेको सहजै देख्न सकिनेछ। यो सडकखण्डमा ‘ओभरटेक’ नगरी संयमित भइ यात्रा गर्न चालक एवं यात्रीलाई आग्रहसमेत गरिएको श्रेष्ठले बताए।
शुक्रबार मात्र काठमाडौँबाट काँकडभिट्टा जाँदै गरेको रात्रिबसको क्याबिनमा ढुङ्गा बजारिएको थियो। यद्यपि चालकको होसियारीले दुर्घटना टरेको थियो। तुइन खोलामा गत वर्षायाममा निरन्तर पहिरो जाँदा पटकपटक सडक अवरुद्ध भएको थियो।
चैत १, २०८२ आइतबार १०:२७:४० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
