एरेना भन्छन्- 'नेपाली खेलाडीमा धेरै क्षमता छ, अब साफ जित्ने लक्ष्य छ'
काठमाडौं : स्वीट्जरल्यान्डका गुग्लिएल्मो एरेना नेपाली पुरुष राष्ट्रिय फुटबल टोलीको मुख्य प्रशिक्षकमा नियुक्त भएका छन्।
उनी नियुक्त भएपछि सातदोबाटोस्थित अखिल नेपाल फुटबल संघ (एन्फा) कम्प्लेक्समा प्रशिक्षक एरेनासँग ‘मिट एन्ड ग्रीट’ कार्यक्रममा बोल्दै एरेना आफू नेपाली पुरुष राष्ट्रिय फुटबल टोलीको मुख्य प्रशिक्षकमा नियुक्त हुन पाउँदा खुसी लागेको बताए।
उनले भने, "मेरो लक्ष्य भनेको राष्ट्रिय टिमलाई साफ च्याम्पियनसिप जिताउने नै हो। म सन् २०२६ सम्म टिमको जिम्मेवारीमा रहनेछु। विगतका दिनहरूमा भएका कमजोरी र गल्तीलाई नदोहोर्याइकन अघि बढ्नेछु।"
त्यस्तै उनले नेपाली खेलाडीहरू धेरै क्षमतावान् रहेको बताउँदै आफ्नो प्रशिक्षणमा उनीहरूलाई अझ उत्कृष्ट बनाउने विश्वास व्यक्त गरे। प्रशिक्षक एरेनाले आफ्नो प्राथमिकता रणनीतिक रूपमा टिममा सुधार ल्याउनमा हुने धारणा राखे।
उनले बिहीबार सातदोबाटोस्थित एन्फा कम्प्लेक्समा एन्फाका महासचिव किरण राईबाट नियुक्ति पत्र प्राप्त गरेका थिए।
फागुन २९, २०८२ शुक्रबार १८:०१:१६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
