लगातार टी-२० विश्वकप जित्ने पहिलो टोली बन्यो भारत, न्युजिल्यान्ड ९६ रनले पराजित

काठमाडौं : नरेन्द्र मोदी स्टेडियममा उपस्थित दर्शकहरूको निलो सागरबीच घरेलु टोली भारतले शानदार प्रदर्शन गर्दै लगातार दोस्रो पटक टी-२० विश्वकपको उपाधि उचालेको छ।

उपाधिको प्रमुख दाबेदार मानिएको भारतले एकपक्षीय फाइनल भिडन्तमा न्युजिल्यान्डलाई ९६ रनको भारी अन्तरले पराजित गर्दै समग्रमा आफ्नो तेस्रो टी-२० विश्वकप उपाधि जित्न सफल भएको हो।

यसअघि सन् २०२३ को ५० ओभरको विश्वकप फाइनलमा अष्ट्रेलियासँग यसै मैदानमा व्यहोरेको हारको पीडालाई भुलाउँदै भारतले आफ्ना घरेलु दर्शकलाई उपाधिको खुसी दिएको छ।

अर्कोतर्फ, न्युजिल्यान्डका लागि भने यो लगातार अर्को 'फाइनल-हूडू' साबित भयो। सन् २०१५ यता आईसीसी प्रतियोगिताहरूमा न्युजिल्यान्डको यो पाँचौं फाइनल हार हो, जुन यसपटक सबैभन्दा फराकिलो अन्तरको रह्यो।

भारतीय ब्याटिङको आक्रामक सुरुवात
इङ्गल्याण्डविरुद्धको सेमिफाइनल जस्तै न्युजिल्यान्डले पनि टस जितेर भारतलाई पहिले ब्याटिङको निम्तो दिएको थियो। तर भारतीय ब्याटरहरूले सुरुवातदेखि नै विष्फोटक ब्याटिङ गर्दै न्युजिल्यान्डका बलरहरूको योजना विफल पारे।

ओपनर अभिषेक शर्माले आक्रामक शैलीमा खेल्दै १८ बलमै अर्धशतक पूरा गरे, जुन टी-२० विश्वकपको नकआउट चरणको इतिहासकै सबैभन्दा छिटो अर्धशतक हो।

उनले इशान किशनसँग मिलेर पावरप्लेमै ९२ रन जोडेका थिए। किशनले पनि उत्कृष्ट लय देखाउँदै २३ बलमा अर्धशतक प्रहार गरे। दुवैले २०० भन्दा माथिको स्ट्राइक रेटमा रन जोडे।

तर, भारतीय इनिङ्सको मुख्य आकर्षण सञ्जु सामसन रहे। उनले लगातार दोस्रो इनिङ्समा उत्कृष्ट ब्याटिङ गर्दै ८९ रनको शानदार पारी खेले।

यी तीन ब्याटरको विष्फोटक प्रदर्शन मद्दतमा भारतले ५ विकेटको क्षतिमा २५५ रनको विशाल योगफल खडा गर्यो। अन्तिम ओभरहरूमा शिवम दुवेले २४ रन जोड्दै टोलीको योगफललाई थप बलियो बनाएका थिए।

जसप्रित बुमराहको घातक बलिङ
२५६ रनको विशाल लक्ष्य पछ्याएको न्युजिल्यान्डलाई सुरुवाती झट्का दिन भारतीय बलरहरू सफल भए। विशेषगरी तीव्र गतिका बलर जसप्रित बुमराहको अगाडि न्युजिल्यान्डका ब्याटरहरू निरीह साबित भए।

आफ्नो घातक ‘अफ-कटर’ मार्फत विपक्षीलाई हैरान पारेका बुमराहले ४ ओभरमा मात्र १५ रन खर्चेर ४ महत्त्वपूर्ण विकेट लिए।

उनले फर्ममा रहेका रचिन रबिन्द्रलाई उत्कृष्ट जालमा फसाएका थिए। त्यसैगरी, स्पिनर अक्षर पटेलले पनि ३ विकेट लिँदै न्युजिल्यान्डको मध्यक्रम ध्वस्त पारे।

न्युजिल्यान्डका लागि टिम सिफर्टले २३ बलमा अर्धशतक बनाएर केही सङ्घर्ष गरे पनि त्यो पर्याप्त भएन।

कप्तान मिचेल सान्टनर (४३ रन) र ड्यारिल मिचेल बाहेक अन्य ब्याटरले भारतीय बलिङ आक्रमणको सामना गर्न सकेनन्। अन्ततः न्युजिल्यान्ड ९६ रनको फराकिलो अन्तरले पराजित हुन पुग्यो।

यस जितसँगै भारत टी-२० विश्वकपको इतिहासमा लगातार दुई पटक उपाधि रक्षा गर्ने पहिलो टोली समेत बनेको छ।