गगनले भने- 'गठबन्धनलाई अस्वीकार गर्छौं, तर देश बनाउन सबैसँग मिल्छौं'

नुवाकोट : नेपाली कांग्रेसका सभापति गगन थापाले सम्पूर्ण राजनीतिक दलहरूसँगको सहकार्यले पाँच वर्षमा मुलुकलाई समृद्ध बनाउन सकिन बताएका छन्।

नुवाकोटको विदुर नगरपालिका-४ बट्टारमा आइतबार आयोजित ‘चुनावी सभा’लाई सम्बोधन गर्दै थापाले कांग्रेसले मुलुकमा भइरहेका बेथिति अन्त्य गर्न सम्पूर्ण पक्षलाई साथमा लिन आवश्यक भएको बताए।

“पाँच वर्षमा देशमा व्यापक सुधार गर्न सकिन्छ। यसलाई कांग्रेसले मुख्य सङ्कल्प लिएर अघि बढेको छ,” उनले भने, “अहिलेको तुलनामा पाँच गुणा बढी काम गर्छौं। सजग र सचेत भएर मुलुकमा कुनै अप्रिय घटना हुन दिन्नौं।”

चुनावमा स्वच्छ प्रतिस्पर्धा गर्नुपर्छ भन्ने अठोटले दलहरुबीच गठबन्धनको अभ्यासलाई अस्वीकार गर्दै अघि बढेको उल्लेख गर्दै थापाले कांग्रेस देश सञ्चालन गर्न सबै पक्षसँग सहकार्य गरेर अघि बढ्ने बताए।

देश विकासका लागी पूर्वाधार निर्माणका क्षेत्रमा देखिएको समस्यादेखि किसानले समयमा नै मल पाउन नसकेका विषयसम्म कानूनी अवरोधको चुनौती रहेकाले अब बन्ने सरकारले त्यसलाई सुधार गर्दै जनताका स-साना समस्यालाई पनि महत्वका रूपमा लिने उनले विश्वास दिलाए।