बैतडीमा एक महिनामा ३ निर्वाचन प्रहरीको मृत्यु

बैतडी :आसन्न निर्वाचन सुरक्षाका लागि भर्ना भएका अस्थायी (म्यादी) प्रहरीको मृत्यु भएको छ। मृत्युु हुनेमा बैतडी मेलौली नगरपालिका-६ हतरङ्गाका ३८ वर्षीय राजेन्द्रप्रसाद भट्ट छन्।

जिल्ला प्रहरी प्रवक्ता प्रहरी निरीक्षक सुरज सिंहका अनुसार इलाका प्रहरी कार्यालय मेलौलीमा कार्यरत भट्ट ‘ड्युटी’ सकेर गए राति घर फर्किएकामा थि। घरमै एक्कासी बेहोस भएका भएपछि उनलाई ततेकाल उपचारका लागि केशरपुर प्राथमिक स्वास्थ्य केन्द्र लगिएकाे थियाे। स्वास्थ्य केन्द्रमा पुर्याउँदा चिकित्सकले गएराति नै मृत घोषणा गरेका हुन्।

घटनाबारे थप अनुसन्धान भइरहेको प्रहरीले जनाएको छ।

पछिल्लो एक महिनाभित्रै बैतडीमा तीन जना म्यादी प्रहरीले ज्यान गुमाइसकेका छन्। 

यसअघि फागुन ८ गते दशरथचन्द नगरपालिका-४ बबेत घर भएका ३८ वर्षीय निर्वाचन प्रहरी महादेव वडको पनि ज्यान गएको थियो। खाना खान घर गएको समयमा अचेत अवस्थामा भेटिएका महादेवलाई उपचारका लागि जिल्ला अस्पतालमा पुर्याउँदा चिकित्सकले मृत घोषणा गरेका थिए।

यस्तै, माघ तेस्रो साता पनि दशरथचन्द नगरपालिका-४ घर भएका निर्वाचन प्रहरी ३२ वर्षीय प्रकाश चन्दको भिरबाट लडेर ज्यान गएको थियो।