बंगलादेशका प्रधानमन्त्रीको राष्ट्रको नाममा पहिलो सम्बोधन : भ्रष्टाचार अन्त्य र विधिको शासन मुख्य प्राथमिकता, माफिया राज नचल्ने दाबी

एजेन्सी : बंगलादेशका नवनियुक्त प्रधानमन्त्री तारिक रहमानले मुलुकमा व्याप्त भ्रष्टाचारको अन्त्य, विधिको शासन र आर्थिक सुधारलाई आफ्नो मुख्य प्राथमिकतामा राखेका छन्।

पहिलो पटक राष्ट्रको नाममा सम्बोधन गर्दै उनले पूर्णतः बंगलादेशको आन्तरिक राजनीति, सुशासन र भावी योजनाहरूमा आफ्नो ध्यान केन्द्रित गर्ने बताएका छन्।

उनले विगतको फासीवादी शासनकालमा राज्यका संयन्त्रहरू ध्वस्त भएको आरोप लगाउँदै अब देश विधिको शासन र नीति-नियम अनुसार चल्ने उद्घोष गरे। उनले कुनै पनि राजनीतिक प्रभाव वा जोर-जुलुमका आधारमा नभई कानुनको आधारमा राज्य सञ्चालन हुने प्रतिबद्धता जनाए।

मुलुकको अर्थतन्त्र कमजोर हुनुमा भ्रष्टाचार र माफिया सिन्डिकेट मुख्य जिम्मेवार रहेको उनको ठम्याइ छ। उनले सबै प्रकारका अनियमितता र सिन्डिकेटहरू तोड्ने संकल्प गर्दै भ्रष्टाचार नियन्त्रणलाई सरकारको पहिलो प्राथमिकतामा राखेका छन्।

पवित्र रमजान महिना सुरू हुन लागेको सन्दर्भमा उनले व्यवसायीहरूलाई महँगी नबढाउन र अस्वभाविक नाफा नकमाउन अपील गरेका छन्। आम नागरिकलाई दैनिक उपभोग्य वस्तुहरू सहज र सुलभ मूल्यमा उपलब्ध गराउन सरकारले कडा कदम चाल्ने उनले बताए।

उनले बंगलादेश मुस्लिम, हिन्दु, बौद्ध, क्रिश्चियनका साथै पहाड र समतल क्षेत्रमा बस्ने सबै नागरिकको साझा घर भएको बताए। धर्म, वर्ण र लिंगका आधारमा कसैलाई पनि भेदभाव नगरिने र सबैको समान अधिकार सुनिश्चित गरिने उनले स्पष्ट पारे।

देशको ठूलो जनसंख्यालाई ‘दक्ष जनशक्ति’मा रूपान्तरण गरी विश्व बजारमा प्रतिस्पर्धा गर्न योग्य बनाउने उनको योजना छ। उनले सूचना प्रविधि र कृत्रिम बुद्धिमत्ताको युगमा युवाहरूलाई अगाडि बढाउन सरकारले सबै प्रकारको सहयोग गर्ने बताए।

राजधानी ढाकामा बढ्दो जनसंख्याको चाप कम गर्न देशभर रेल, जल र सडक मार्गको सञ्जाल विस्तार गर्ने र सेवा सुविधाहरूलाई गाउँ-गाउँसम्म पुर्याउने योजना उनले अघि सारेका छन्।

आफ्नो पार्टीबाट निर्वाचित सांसदहरूले सरकारी सुविधाका कर-मुक्त गाडी र प्लटहरू नलिने निर्णय भएको जानकारी दिँदै उनले राजनीतिलाई सेवाको रूपमा अगाडि बढाउन खोजेको बताए।

प्रधानमन्त्रीले बंगलादेशी जनताले दिएको मतको सम्मान गर्दै आफूसँग देश विकासको स्पष्ट योजना रहेको र त्यसलाई सफल पार्न सबैको सहयोगको अपेक्षा गरेका छन्।