नामिबियालाई हराउँदै पाकिस्तान टी-२० विश्वकपको सुपर-८ मा, यस्तो छ नयाँ समूह विभाजन

काठमाडौं : श्रीलंकाको कोलम्बोमा भएको समूह चरणको आफ्नो अन्तिम खेलमा नामिबियालाई १०२ रनको फराकिलो अन्तरले पराजित गर्दै पाकिस्तान टी-२० विश्वकप २०२६ को सुपर-८ मा प्रवेश गरेको छ।

पाकिस्तानको यो जितसँगै सुपर-८ मा पुग्ने सबै ८ टोलीको टुंगो लागेको छ। सन् २०२४ को विश्वकपमा पाकिस्तान सुपर-८ मा पुग्न सकेको थिएन।

समूह चरणबाट छानिएका टोलीहरूमा समूह ए बाट भारत र पाकिस्तान, समूह बी बाट श्रीलंका र जिम्बावे, समूह सी बाट वेस्ट इन्डिज र इंग्ल्यान्ड तथा समूह डी बाट दक्षिण अफ्रिका र न्युजिल्यान्ड रहेका छन्।

सुपर-८ को समूह विभाजन
अब सुपर-८ चरणका लागि टोलीहरूलाई दुई समूहमा विभाजन गरिएको छ।

यो चरणमा सबै टोलीको अंक शून्यबाट सुरु हुनेछ र समूह चरणको रन रेट गणना हुने छैन। हरेक टोलीले आफ्नो समूहका अन्य टोलीहरूसँग एक-एक खेल खेल्नेछन्।

समूह १ मा भारत, जिम्बावे, वेस्ट इन्डिज र दक्षिण अफ्रिका तथा समूह २ मा इंग्ल्यान्ड, न्युजिल्यान्ड, पाकिस्तान र श्रीलंका रहनेछन्।

सुपर-८ को पहिलो खेल शनिबार कोलम्बोमा पाकिस्तान र न्युजिल्यान्डबीच हुनेछ। दुवै समूहका शीर्ष दुई टोली सेमिफाइनलमा प्रवेश गर्नेछन्।

यसपटक सेमिफाइनल र फाइनल खेलको स्थान पाकिस्तान र भारतको नतिजामा निर्भर हुनेछ।

यदि पाकिस्तान सेमिफाइनलमा पुगेमा यो खेल कोलम्बोमा हुनेछ। यदि पाकिस्तान पुग्न सकेन भने यो खेल भारतको कोलकातामा हुनेछ।

दोस्रो सेमिफाइनल खेल मुम्बईको वानखेडे स्टेडियममा हुनेछ। यदि भारत सेमिफाइनलमा पुगेमा उसले यही खेल खेल्नेछ।

यदि पाकिस्तान फाइनलमा पुगेमा फाइनल खेल कोलम्बोमा हुनेछ। अन्यथा, फाइनल भारतको अहमदाबादमा हुनेछ। सेमिफाइनल र फाइनलका लागि ‘रिजर्भ डे’को व्यवस्था गरिएको छ।

सुपर-८ मा पुगेका यी ८ टोलीले अस्ट्रेलिया र न्युजिल्यान्डमा हुने २०२८ को टी-२० विश्वकपका लागि स्वतः स्थान पक्का गरेका छन्।

सुपर-८ मा नपुगे पनि सह-आयोजक भएको नाताले अस्ट्रेलिया स्वतः छनोट भएको छ।

यसका साथै, आईसीसीको वरीयता (मार्च ९, २०२६ सम्मको) का आधारमा बंगलादेश, अफगानिस्तान र आयरल्यान्डले पनि २०२८ को विश्वकपमा सिधै स्थान बनाएका छन्।

२० टोली सहभागी हुने उक्त विश्वकपका बाँकी ८ स्थान भने क्षेत्रीय छनोट खेलहरूबाट निर्धारण हुनेछन्।म