पूर्वमुख्यमन्त्री शर्मा पार्टीबाट निष्कासित, सांसद पद पनि धरापमा

सुर्खेत : नेपाली कम्युनिस्ट पार्टीले कर्णाली प्रदेशका पूर्वमुख्यमन्त्री राजकुमार शर्मालाई पार्टीको साधारण सदस्यसमेत नरहने गरी निष्कासन गरेको छ। कारबाहीसँगै उनको कर्णाली प्रदेशसभा सदस्य पद खारेजको प्रक्रिया पनि अघि बढाइएको छ।

पार्टीका कर्णाली प्रदेशसभा संसदीय दलका प्रमुख सचेतक कृष्णबहादुर जिसीका अनुसार शर्मालाई गरिएको कारबाहीसम्बन्धी पत्र बुधबार नै कर्णाली प्रदेश सभा सचिवालयमा पठाइएको हो। २०७९ सालको प्रदेशसभा निर्वाचनमा रुकुम पश्चिमबाट निर्वाचित शर्मा जनार्दन शर्मा नेतृत्वको प्रगतिशील लोकतान्त्रिक पार्टीका कर्णाली प्रदेश इन्चार्जसमेत हुन्।

प्रमुख सचेतक जिसीले शर्माले जानीजानी पार्टीको नीति, सिद्धान्त, उद्देश्य र आचरण विपरीत कार्य गरेको ठहर गर्दै पार्टी विधान तथा कर्णाली प्रदेश संसदीय दलको विधान २०८२ बमोजिम केन्द्रीय समिति लगायत दलका सम्पूर्ण जिम्मेवारीबाट हटाउँदै साधारण सदस्यबाट समेत निष्कासन गरिएको जानकारी दिए।

उनका अनुसार राजनीतिक दलसम्बन्धी ऐन, २०७३ को दफा ३२ को उपदफा (२) र (५) बमोजिम पार्टी सदस्यबाट निष्कासित व्यक्ति प्रदेश सभा सदस्य रहन नपाउने कानुनी व्यवस्था भएकाले शर्मालाई प्रदेश सभा सदस्य पदबाट समेत मुक्त गर्न आवश्यक प्रक्रिया अघि बढाउन सचिवालयलाई पत्राचार गरिएको हो।

कर्णाली प्रदेश सभा सचिवालयका सचिव जीवराज बुढाथोकीले कारबाहीसम्बन्धी पत्र दर्ता भइसकेको र आवश्यक प्रक्रिया अगाडि बढाइएको जानकारी दिए।